Gələcək Meta Ray Ban eynəkləri insan üzününü skanı funksiyasını əldə edə bilərlər

     Meta şirkəti özünün Ray-Ban Meta ağıllı eynəyinin gələcək versiyalarında üz tanıma texnologiyasını əlavə etmək imkanını araşdırır. Superqavrayış adlı yeni funksiya istifadəçilərə ətrafdakı insanları üzlərini skan etməklə identifikasiya etməyə imkan verəcək. Lakin bu, məxfiliklə bağlı problemlər yarada bilər, çünki hər kəs belə davranışı xoş qarşılamaya bilər. Bu səbəbdən Meta daxilində kameranın üz tanıma prosesinə başladığını göstərən LED indikatorunun söndürülüb-söndürülməməsi müzakirə olunur. Hazırda satışda olan Ray-Ban Meta AI ağıllı eynək modelləri kameranın aktiv olduğunu göstərən və ətrafdakı insanları xəbərdar edən yanıb-sönən LED indikatorla təchiz edilib.

     Mənbələrin məlumatına görə, superqavrayış funksiyasına malik Aperol və Bellini adlı yeni ağıllı eynək modelləri 2026-cı ildə satışa çıxarılacaq. Gözlənilir ki, bu cihazlar daha güclü batareyalarla təchiz ediləcək, çünki yeni funksiyanın istifadəsi zamanı enerji sərfiyyatı xeyli artır. Hazırda mövcud olan Ray-Ban Meta AI eynəklərində bu texnologiya test edildikdə, avtonom iş vaxtı cəmi 30 dəqiqəyə qədər azalırdı. Meta tərəfindən hazırlanmış və “Ey, Meta, canlı süni zəkanı işə sal” əmri ilə aktivləşən süni zəka əsaslı proqram təminatı yalnız üzləri tanımaqla kifayətlənməyəcək. O həmçinin eynək sahibinə məsələn, açarlarını götürməyi xatırlada biləcək və ya evə gedərkən yoldan marketə baş çəkməyi yada sala biləcək. Superqavrayış rejimində eynəklərin kamerası və sensorları daimi işlədiyindən, süni zəka istifadəçinin fəaliyyətlərini izləyə və nəyisə unutduqda ona xatırlatma edə biləcək.

Mənbə: The Verge