Google Gemini ilə yeni ağıllı ev dinamikini təqdim etdi

    Google süni intellekt əsaslı yeni ağıllı ev dinamiki olan Google Home Speaker modelini təqdim edib. 99,99 dollar qiymət etiketi ilə satışa çıxarılan cihaz şirkətin 2020-ci ildə təqdim etdiyi Nest Audio modelindən sonra bazara çıxardığı ilk müstəqil ağıllı dinamikdir. Yeni Google Home Speaker-in əsas fərqi Gemini süni intellekt modeli ilə təchiz olunmasıdır. Bu sayədə istifadəçilər cihazla daha təbii şəkildə ünsiyyət qura, mürəkkəb və çoxmərhələli əmrlər verə biləcəklər. Məsələn, istifadəçi eyni anda işıqları tənzimləmək, musiqi səsləndirmək və taymer qurmaq kimi bir neçə əmri bir cümlədə səsləndirə bilər.

    Gemini həmçinin istifadəçinin danışıq zamanı etdiyi düzəlişləri də anlayır. Beləliklə, əmri yenidən təkrarlamağa ehtiyac qalmır və cihaz konteksti qoruyaraq düzgün cavab verir. Google Home Speaker 10 fərqli səs seçimi ilə təqdim olunur və yalnız ağıllı ev funksiyaları ilə məhdudlaşmır. İstifadəçilər cihazla müxtəlif mövzularda söhbət edə, suallar verə və Gemini-dən ətraflı məlumat ala biləcəklər.