Google Pixel 11 təqdimatını böyük şouya çevirəcək

    Google avqustun 12-də növbəti böyük “Made by Google” tədbirini keçirəcək. Şirkətin yayımladığı yeni videoya əsasən, Pixel 11 seriyasının təqdim olunacağı tədbirin aparıcısı məşhur televiziya aparıcısı Trevor Noah olacaq. Nyu-Yorkda keçiriləcək tədbir Bakı vaxtı ilə avqustun 13-nə keçən gecə saat 02:00-da başlayacaq. Google-un builki təqdimatı da ənənəvi texnologiya tədbirindən daha çox əyləncə şousu formatında təşkil olunacaq. Trevor Noah ilə yanaşı tədbirdə bir sıra məşhur simaların iştirakı gözlənilir. Onların arasında “Call Her Daddy” podkastının aparıcısı Alex Cooper, hindistanlı kriketçi Shubman Gill, yaponiyalı aktrisa Ayami Nakajo və NBA ulduzu Stephen Curry var.

    Google ötən il də oxşar strategiyadan istifadə etmişdi. 2025-ci ildə “Made by Google” tədbirini Jimmy Fallon aparmışdı. Şirkətin ardıcıl olaraq məşhur simaları təqdimata cəlb etməsi Pixel cihazlarını yalnız texnologiya həvəskarlarına deyil, daha geniş auditoriyaya tanıtmaq istədiyini göstərir. Tədbirin əsas diqqət mərkəzində yeni Pixel 11 smartfonları olacaq. Google daha əvvəl Pixel 11 Pro və qatlanan Pixel 11 Pro Fold modellərini qısa şəkildə nümayiş etdirib. Təqdimat üçün yayımlanan videoda yeni smartfonla yanaşı, yeni ağıllı saat da görünür. Beləliklə, avqustun 12-də keçiriləcək tədbirdə Pixel 11 seriyası ilə yanaşı Google-un yeni nəsil ağıllı saatının və digər cihazlarının təqdim olunması gözlənilir. Mövcud məlumatlar yeni cihazların əvvəlki nəsillərlə müqayisədə daha yüksək qiymətə satışa çıxa biləcəyini də göstərir.