main-post-cover

    Google Pixel 7a-nın bəzi texniki özəllikləri məlum olub

    Cihazlar+
    14.11.2022
    Emil Nəcəfov
        Google şirkəti hal hazırda Pixel 7a smartfonu üzərində çalışır. İndi isə sözügedən smartfonun texniki özəllikləri barəsində məlumatlar internetdə ortaya çıxıb. Qeyd etmək lazımdır ki, Google Pixel a seriyasının smartfonları adi Pixel seriyasının smartfonlarından bir qədər sadələşdirilmiş texniki özəlliklər ilə fərqlənirlər. İnsayderlərdən biri Pixel 22 Mid-range kod adına sahib smartfon barəsində məlumatlar əldə edib. Nəzərə alsaq ki, Pixel 22 Premium kod adı məhz Pixel 7 smartfonuna aid idi, burdan belə qənaətə gəlmək olar ki, Pixel 22 Mid-range kod adı Pixel 7a-ya aiddir.
        Beləliklə verilmiş məlumata əsasən Pixel 7a smartfonu 90 Hz-lik təsvir yenilənməsinə sahib 1080p keyfiyyətli ekran ilə təchiz olunacaq. Daha öncəki Pixel a modellərində yalnız 60 Hz-lik təsvir yenilənməsinə sahib ekranlardan istifadə edilirdi. Bununla yanaşı Pixel 7a modeli 64 MP-lik (Sony IMX787) əsas arxa kameranı əldə edəcək. Smartfonun Pixel 7 və Pixel 7 Pro modellərində istifadə edilən Google Tensor G2 prosessorunu əldə edib-etməyəcəyi bilinmir. Ola bilər ki, şirkət Pixel 7a-da Tensor prosessorunun birinci nəslindən istifadə etsin. Məlumatda qeyd edilib ki, Pixel 7a 5 vatt gücündə sürətli naqilsiz şarj texnologiyasını dəstəkləyəcək. Smartfon gələn ilin birinci yarısında təqdim oluna bilər.
    Linki kopyala