Google Pixel 8 smartfonlarının bütün texniki göstəriciləri ortaya çıxıb

    Google Pixel 8 smartfonlarının təqdimatlarına 1 həftə qalmış onların texniki göstəriciləri internetdə ortaya çıxıb. Qeyd etmək lazımdır ki, Google Pixel 8 smartfon seriyası 4 oktyabr tarixində təqdim ediləcək və bu seriyaya Pixel 8 və Pixel 8 Pro modelləri daxil olacaqlar. Beləliklə ortaya çıxmış məlumatlara əsasən adi Pixel 8 modeli 120 Hz-lik təsvir yenilənməsinə sahib Full HD+ keyfiyyətli 6.2 düym OLED ekranla təchiz olunacaq. Ekranın maksimal parlaqlıq səviyyəsi 2000 nit təşkil edəcək və Gorilla Glass Victus qoruyucu şüşəsi əhatə olunacaq. Smartfon Tensor G3 prosessoru vasitəsilə çalışacaq və 8 GB RAM ilə 128/256 GB daxili yaddaş həcminə sahib olacaq.

    Smartfon özündə 50 MP + 12 MP ikili arxa kameranı, 10.5 MP-lik ön kameranı və 27 vatt gücündə sürətli şarj texnologiyalı 4575 mAh enerji tutumlu batareyanı birləşdirəcək. Pixel 8 həmçinin 18 vatt gücündə sürətli naqilsiz şarj texnologiyasını da dəstəkləyəcək. Google Pixel 8 Pro-ya gəldikdə isə o, 120 Hz-lik təsvir yenilənməsinə sahib Full HD+ keyfiyyətli 6.7 düym OLED ekranla təchiz olunacaq. Ekranın maksimal parlaqlıq səviyyəsi 2400 nit təşkil edəcək və Gorilla Glass Victus 2 qoruyucu şüşəsi ilə əhatə olunacaq.

    Adi Pixel 8 kimi Pixel 8 Pro da Tensor G3 prosessoru vasitəsilə çalışacaq. Bundan əlavə olaraq Pixel 8 Pro modeli özündə Titan M2 adlı təhlükəsizlik çipini də birləşdirəcək. Smartfon 12 GB RAM-a, 512 GB daxili yaddaş həcminə, 50 MP + 48 MP + 48 MP üçlü arxa kameraya, 10.5 MP-lik ön kameraya və 30 vatt gücündə sürətli şarj texnologiyalı 5050 mAh enerji tutumlu batareyaya sahib olacaq. Üstəlik Pixel 8 Pro 23 vatt gücündə sürətli naqilsiz şarj texnologiyasını da dəstəkləyəcək. Hər iki smartfonun gövdəsi IP68 standartı üzrə sudan qorunmalıdır.