Google Pixel Buds 2a və Pro 2 qulaqlıqlarını yeni funksiyalarla yeniləyir

    “Google” “Pixel Buds 2a” və “Pixel Buds Pro 2” qulaqlıqları üçün böyük proqram yeniləməsi yaymağa başlayıb. Avqustda göstərilən funksiyalar istifadəçilərə mərhələli şəkildə çatır. Yeniliklər arasında yuxuya getdiyinizi müəyyənləşdirmək, zəngləri idarə etmək, canlı tərcümə və səs ayarları var. İlk “Pixel Buds Pro” modelinin bu yeniləməni alıb-almayacağı hələ dəqiq deyil.

    Əsas yenilik medianın avtomatik dayandırılmasıdır. İstifadəçi “Pixel Watch” taxılı halda yuxuya getdikdə qulaqlıq musiqini saxlayacaq və bildirişləri səssizə alacaq. Toxunma idarəetməsi də sönəcək. Beləliklə, yuxuda qulaqlığa təsadüfən toxunmaq hər hansı əmri işə salmayacaq. Funksiya həm “Pixel Buds 2a”, həm də “Pixel Buds Pro 2” üçün hazırlanıb.

    Zəng zamanı qulaqlığa toxunaraq mikrofonu açıb-bağlamaq da olacaq. Bunun üçün qulaqlıq “Pixel” telefonuna qoşulmalıdır. “Gemini” səs əmrləri ilə ANC-ni, yəni ətrafdakı səs-küyü aktiv şəkildə azaltma funksiyasını idarə etmək olar. İstifadəçilər səs ayarlarını və toxunma əmrlərini də dəyişə biləcəklər.

    Təkmilləşdirilmiş canlı tərcümə qulaqlığa 1 dəfə toxunduqda işə düşəcək. Telefon cibdə qalsa belə, “Google Translate” tətbiqi danışığı və ya ətrafda eşidilən xarici dili tərcümə edəcək. Yalnız “Pixel Buds Pro 2” üçün olan dinamik ANC qulaqlığın qulaqda necə oturduğunu nəzərə alaraq səsi və səs-küyün azaldılması səviyyəsini avtomatik dəyişəcək.

    Yeniləməni yoxlamaq üçün “Pixel Buds” tətbiqinin son buraxılışını və proqram təminatının release_6.144 versiyasını quraşdırmaq lazımdır. Tətbiqdə əvvəl “More settings”, sonra “Firmware update” bölməsinə keçmək olar. Daha əvvəl yayılan məlumatlardan birində 2022-ci ildə çıxan “Pixel Buds Pro” modelinin də yenilikləri alacağı yazılmışdı. Lakin “Google” icma elanının son variantından bu modelə dair qeydi çıxarıb. Buna görə həmin qulaqlığın dəstək alıb-almayacağı hələ aydın deyil.