Google və Epic Games illərlə davam edən mübahisəni bitirdi

     Technote.az “TechCrunch” platformasına istinadən bildirir ki, Google uzun müddətdir davam edən hüquqi mübahisədən sonra Epic Games ilə razılığa gəldiyini açıqlayıb və bunun nəticəsində Play Store siyasətində mühüm dəyişikliklər edəcəyini bildirib. Yeni razılaşmaya əsasən, Google tətbiqdaxili alışlar üçün aldığı komissiyanı 30 %-dən 20 %-ə endirəcək.

     Şirkətin açıqlamasına görə, əgər tətbiq tərtibatçıları Google-un öz ödəniş sistemindən istifadə etsələr, əlavə olaraq 5 % xidmət haqqı tətbiq olunacaq. Bu dəyişikliklər həm də mobil tətbiq bazarında rəqabəti artırmaq məqsədi daşıyır.

     Razılaşmanın ən diqqət çəkən tərəflərindən biri isə alternativ tətbiq mağazalarının Android-də daha asan quraşdırılmasıdır. Google bu məqsədlə “Registered App Stores” adlı yeni proqram təqdim edir. Bu proqram sayəsində istifadəçilər Play Store-dan kənar tətbiq mağazalarını daha sadə şəkildə quraşdıra biləcəklər. Bununla belə, bu mağazalar müəyyən təhlükəsizlik və keyfiyyət standartlarına cavab verməlidir.

     Məhz bu məsələ əvvəllər Epic Games-in əsas narazılıqlarından biri idi. Şirkət hesab edirdi ki, Android-də Play Store xaricindən tətbiq quraşdırmaq prosesi istifadəçiləri qorxudan xəbərdarlıqlarla çətinləşdirilir.

     Yeni razılaşma həm də məşhur oyun Fortnite-in yenidən qlobal şəkildə Play Store-a qayıtmasına imkan verəcək. Eyni zamanda Epic Games Android üçün öz alternativ tətbiq mağazası olan Epic Games Store üzərində işləməyə davam edəcək.