GoPro 8K çəkiliş edən yeni Mission 1 kameralarını təqdim etdi

    Technote.az “The Verge” platformasına istinadən bildirir ki, GoPro yeni nəsil peşəkar aksiya kameraları olan Mission 1 seriyasını rəsmi olaraq təqdim edib. Şirkətin açıqladığı yeni xəttə daha böyük sensorlar, yüksək çözünürlüklü video imkanları və ilk dəfə dəyişdirilə bilən obyektiv dəstəyi kimi diqqətçəkən yeniliklər daxildir.

    Yeni seriya ümumilikdə üç modeldən ibarət olacaq: Mission 1, Mission 1 Pro və ən üst səviyyə model olan Mission 1 Pro ILS. İlk iki model 28 may tarixində satışa çıxacaq, ən premium versiyanın isə 2026-cı ilin üçüncü rübündə bazara gəlməsi gözlənilir. Mission 1 ailəsinin əsas yeniliklərindən biri bütün modellərdə istifadə olunan 50 MP çözünürlüklü 1 düymlük sensor və şirkətin yeni hazırladığı GP3 prosessorudur. Standart Mission 1 modeli 8K 30 FPS video çəkilişi dəstəkləyir, həmçinin 4:3 sensor formatında 4K 120 FPS açıq kadr (open gate) çəkiliş imkanı təqdim edir. Bu modeldə 1080p çözünürlükdə maksimum 240 FPS slow-motion çəkiliş mümkündür.

    Daha güclü Mission 1 Pro modeli isə video imkanlarını daha da artıraraq 8K 60 FPS və 8K 30 FPS open gate çəkiliş təklif edir. Slow-motion rejimində isə bu model 1080p-də 960 FPS kimi olduqca yüksək sürətli çəkiliş edə bilir. Seriyanın ən maraqlı modeli hesab olunan Mission 1 Pro ILS isə GoPro tarixində ilk dəfə Micro Four Thirds obyektiv sistemi ilə gələcək. Bu o deməkdir ki, istifadəçilər Panasonic, OM System və digər istehsalçıların yüzlərlə fərqli obyektivini kameraya qoşa biləcəklər. Bu xüsusiyyət GoPro-nu artıq sadəcə aksiya kamerası deyil, mini peşəkar çəkiliş platformasına çevirir.