GoPro Lit HERO action kamerası təqdim edilib - QİYMƏTİ

     GoPro yeni giriş seqmentli action kamerası Lit HERO-nu təqdim edib. O, kompakt ölçüləri, əlçatan qiyməti və gündəlik çəkiliş üçün geniş imkanları özündə birləşdirir. Lit HERO 5.7 x 4.8 x 2.95 sm ölçülü gövdəyə malikdir. Kamera dəyişdirilə bilən obyektiv qapağı ilə möhkəm konstruksiyaya sahibdir və 5 metr dərinliyə qədər suda qorunur, bu da onu aktiv istirahət üçün yararlı edir. Əsas yenilik isə obyekt kameraya yaxın olduqda belə, gecə vaxtı da parlaq videolar çəkməyə imkan verən 4 ön LED işıqdır.

     GoPro Lit HERO 4K (4:3, 30 fps) keyfiyyətində video yazmağı bacarır ki, bu da sonrakı redaktəni asanlaşdırır və həm portret, həm də landşaft orientasiyasında istifadə etməyə imkan verir. Bundan əlavə, 4K (16:9, 60 fps) keyfiyyətində, 60 Mbit/s-ə qədər bitreytlə çəkiliş də mövcuddur. Kamera 12 MP-lik 1/2.8 düym sensor, f/2.8 diafraqmalı və 15 mm fokus məsafəli obyektivlə təchiz olunub. Videolar microSD kartlara yazılır, GoPro-nun bulud xidməti abunəçiləri (ildə 49.99 avro) isə cihaz USB-C vasitəsilə şarj olunduğu müddətdə faylları Wi-Fi 5 üzərindən avtomatik olaraq yaddaşa yükləyə biləcəklər. GoPro Lit HERO-nun satışına 21 oktyabrda start veriləcək. Onun qiyməti 269.99 avro olacaq.