GoPro Mission 1 seriyası təqdim olundu

    Technote.az “Engadget” platformasına istinadən bildirir ki, GoPro yeni Mission 1 kamera seriyasının qiymətlərini rəsmi olaraq açıqlayıb. Şirkətin yeni nəsil aksiyon kameraları əvvəlki Hero seriyasından daha bahalı olsa da, texniki imkanları ilə ciddi fərq yaradır.

    Seriyanın giriş modeli olan Mission 1 600 dollar qiymətlə satışa çıxarılacaq. Bu model 50 meqapiksellik 1 düymlük sensorla təchiz olunub və aşağı işıq şəraitində daha keyfiyyətli görüntü vəd edir. Kamera 8K 30fps və 4K 120fps video çəkilişini dəstəkləyir, həmçinin 10-bit GP-Log2 rəng və 32-bit float audio kimi peşəkar xüsusiyyətlər təqdim edir.

   Daha güclü model olan Mission 1 Pro isə 700 dollara təqdim olunur və əsasən peşəkar istifadəçilərə yönəlib. Bu cihaz 8K 60fps və 4K 240fps çəkiliş imkanı ilə yanaşı, 1080p-də 960fps ultra slow-motion rejimi ilə seçilir. Bundan əlavə, “Open Gate” formatı sayəsində videoları müxtəlif formatlara uyğun şəkildə kəsmək və redaktə etmək daha rahat olur.

    Seriyanın ən fərqli modeli isə Mission 1 Pro ILS-dir. Bu model dəyişdirilə bilən obyektiv sistemi (Micro Four Thirds) ilə gəlir və eyni texniki gücü qoruyur. Qiyməti də 700 dollar olsa da, satışa 2026-cı ilin üçüncü rübündə çıxarılacaq.

    Bütün modellər üçün aksesuarlar 28 maydan etibarən mərhələli şəkildə satışa təqdim olunacaq. GoPro həmçinin 160 dollarlıq yeni simsiz mikrofon sistemini də elan edib. İlkin sifariş edən istifadəçilərə isə əlavə olaraq tutacaq (grip) hədiyyə ediləcək.