GoPro tarixində ilk: Mission 1 Pro ILS dəyişdirilə bilən obyektivlərlə gəlir

    GoPro uzun illərdir əsasən klassik action-kameraları ilə tanınsa da, Mission 1 Pro ILS modeli ilə tamamilə fərqli istiqamətə addım atıb. 699 dollar qiymətə təklif edilən yeni kamera GoPro tarixində dəyişdirilə bilən obyektivləri dəstəkləyən ilk modeldir. Kamera Micro Four Thirds (MFT) sistemindən istifadə edir və 300-dən çox uyğun obyektivlə işləyə bilir. Mission 1 Pro ILS-in əsas texniki imkanları standart Mission 1 Pro ilə böyük ölçüdə eynidir. Kamera 1 düymlük sensora, 8K/60 FPS video çəkilişinə, 4K üçün Open Gate çəkiliş imkanına və 10 saniyə ərzində 960 FPS sürətli çəkiliş rejiminə sahibdir. Arxa hissədə 2,59 düymlük OLED ekran yerləşdirilib, enerji təminatı isə 2150 mAh tutumlu Enduro 2 batareyası vasitəsilə həyata keçirilir.

    Yeni modelin əsas fərqi ön hissədəki Micro Four Thirds obyektiv yuvasıdır. Bunun sayəsində istifadəçilər çəkiliş növündən asılı olaraq genişbucaqlı, portret və digər obyektivlərdən istifadə edə bilirlər. Lakin bunun müəyyən məhdudiyyətləri də var. Mission 1 Pro ILS avtofokus sisteminə sahib deyil və obyektivlə kamera arasında elektron əlaqə mövcud deyil. Buna görə focus-by-wire texnologiyasından istifadə edən bəzi obyektivlər tam işləməyə bilər. Praktik olaraq kamera üçün mexaniki manual fokuslu obyektivlər daha uyğun hesab olunur. GoPro manual fokus prosesini asanlaşdırmaq üçün Focus Peaking, həmçinin görüntünü 4 və 8 dəfə böyüdərək fokusun yoxlanılması funksiyalarını təqdim edir. Quik tətbiqi vasitəsilə smartfon ekranından daha böyük görüntü əldə etmək mümkündür. Mission Monitor tətbiqi isə telefonu kamera üçün xarici monitora çevirir və ekspozisiyanı yoxlamaq üçün Zebra kimi əlavə alətlər təqdim edir.

    Kameranın diqqətçəkən xüsusiyyətlərindən biri də 2,7 dəfə crop faktorudur. Məsələn, 7,5 mm-lik MFT obyektiv Mission 1 Pro ILS-də təxminən 20 mm ekvivalent görüntü bucağı verir. 25 mm-lik obyektiv isə təxminən 70 mm ekvivalentinə çevrilir. Buna görə obyektiv seçərkən crop faktorunu nəzərə almaq lazımdır. Mission 1 Pro ILS-in əsas üstünlüklərindən biri görüntü keyfiyyətidir. Müxtəlif MFT obyektivlərindən istifadə etməklə klassik GoPro kameralarından daha kinematoqrafik görüntü və daha dayaz sahə dərinliyi əldə etmək mümkündür. Kamera maksimum bitreyt və 10-bit GP-Log 2 rejimində çəkilişi dəstəkləyir. Bununla yanaşı, Hyperlapse və yüksək sürətli çəkiliş kimi GoPro kameralarından tanış funksiyalar da qorunub saxlanılıb.

    Kamera foto çəkiliş üçün də maraqlı seçimdir. 50 meqapiksellik sensor, kompakt korpus və geniş MFT obyektiv ekosistemi Mission 1 Pro ILS-i məhsul və digər foto çəkilişlər üçün də istifadə etməyə imkan verir. Bununla belə, yeni model klassik GoPro istifadəçisinə tam uyğun olmaya bilər. Kamera suya davamlı deyil, avtofokusu yoxdur və manual fokus çəkiliş prosesini çətinləşdirə bilər. Xüsusilə vlog çəkərkən istifadəçinin özünü fokusda saxlaması əlavə vaxt və təcrübə tələb edir. Yüksək bitreyt, GP-Log 2, yüksək FPS və telefondan monitor kimi istifadə edildikdə batareya müddəti də azalır. Test zamanı intensiv istifadə şəraitində təxminən iki saatlıq işləmə müddəti əldə edilib.