Hələ təqdim edilməmiş Samsung Galaxy S24 FE smartfonu Geekbench testlərindən keçib

     Son zamanlarda Samsung Galaxy S24 FE smartfonu barəsində daha çox məlumat ortaya çıxır. İndi isə məlum olub ki, Samsung-un bu il ərzində təqdim edəcəyi gözlənilən bu smartfon Geekbench testlərindən keçib. Geekbench-in məlumatlar bazasında Galaxy S24 FE smartfonunun model nömrəsi qismində SM-S721B qeyd edilib. Beləliklə Geekbench sayəsində məlum olub ki, Galaxy S24 FE smartfonunun sahib olacağı prosessor özündə 1 ədəd 3.11 GHz tezlikdə çalışan əsas nüvəni, 2 ədəd 2.9 GHz tezlikdə çalışan nüvəni və 3 ədəd 1.96 GHz tezlikdə çalışan nüvəni birləşdirir.

     Söhbət, Exynos 2400 flaqman prosessorundan gedir. Lakin bu prosessorun Galaxy S24 FE-də istifadə ediləcək versiyasının əsas nüvəsi bir qədər aşağı çalışma tezliyinə sahibdir. Belə ki, prosessorun standart versiyasının əsas nüvəsi 3.21 GHz tezlikdə çalışır. Geekbench testlərindən Galaxy S24 FE-nin 8 GB RAM-a sahib versiyası keçib. Üstəlik Geekbench sayəsində məlum olub ki, smartfon qutudan Android 14-ü əldə edəcək. Beləliklə Galaxy S24 FE smartfonu Geekbench-in bir nüvəli testi çərçivəsində 2047 xal, çox nüvəli testi çərçivəsində isə 6289 xal toplayıb. Smartfonun payız fəslində təqdim olunacağı gözlənilir.