Hələ təqdim olunmamış Samsung Galaxy Tab S10+ planşeti Geekbench testlərindən keçib

     Samsung şirkəti bu il Galaxy Tab S10 planşet seriyasını təqdim etməlidir. Bu seriyaya daxil olacaq modellərdən biri də Galaxy Tab S10+ olacaq. İndi isə sözügedən model barəsində maraqlı bir məlumat ortaya çıxıb. Samsung adətən öz Galaxy Tab planşetlərində ya Exynos ya da Snapdragon prosessorlarından istifadə edir. Lakin görünür, Galaxy Tab S10+ planşeti halında vəziyyət daha fərqli olacaq. Məlum olub ki, Galaxy Tab S10+ planşeti Geekbench testlərindən keçib.

     Geekbench-in məlumatlar bazasında qeyd edilib ki, sözügedən planşet MediaTek şirkətinin 4 nanometrlik Dimensity 9300 Plus flaqman prosessoru vasitəsilə çalışacaq. Geekbench testlərindən planşetin 12 GB RAM-a sahib versiyası keçib. Bununla yanaşı Geekbench sayəsində məlum olub ki, planşet qutudan Android 14-ü əldə edəcək. Galaxy Tab S10+ planşeti Geekbench-in bir nüvəli testi çərçivəsində 2141 xal, çox nüvəli testi çərçivəsində isə 6952 xal toplayıb.