HONOR 600 və 600 Pro təqdim edilib: 7000 mAh batareya, AI imkanları və iPhone-a bənzəyən dizayn

    HONOR orta və orta-üst seqment üçün nəzərdə tutulmuş yeni HONOR 600 və HONOR 600 Pro modellərini təqdim edib. HONOR 400 seriyasının davamçısı olan yeni smartfonlar artıq Azərbaycan bazarında da satışdadır. Bu ilki modellərdə əsas diqqət daha böyük batareyaya, yenilənmiş dizayna, süni intellekt imkanlarına, daha güclü prosessorlara və kamera sistemindəki dəyişikliklərə yönəlib.

    Seriyada HONOR 600 daha çox orta seqmenti, HONOR 600 Pro isə orta-üst seqmenti hədəfləyir. Bu fərq həm texniki xüsusiyyətlərdə, həm kamera imkanlarında, həm enerji yığma dəstəyində, həm də qiymət siyasətində özünü göstərir.

Dizayn tamamilə yenilənib

    HONOR 600 Pro-nun ən çox diqqət çəkən tərəflərindən biri dizayndır. Smartfonun xüsusilə narıncı rəngi ilk baxışdan iPhone 17 Pro modellərini xatırladır. Arxa kamera blokunun quruluşu, rəng seçimi və ümumi dizayn yanaşması HONOR-un bu modeldə daha iddialı görünüş yaratmaq istədiyini göstərir.

    Bununla belə, cihazın gövdə forması, kənarlardakı oval keçidlər və telefoto kamerasının yerləşimi HONOR-un öz dizayn xəttini də qoruduğunu göstərir. Əvvəlki HONOR 400 seriyası ilə müqayisədə kamera bloku demək olar ki, tamamilə yenidən işlənib. Bu, yeni modellərin vizual olaraq daha müasir və daha premium görünməsinə səbəb olub.

    HONOR 600 Pro-nun qalınlığı 7.8 mm-ə qədər azaldılıb, çəkisi isə 200 qram səviyyəsindədir. Bu, əvvəlki model ilə müqayisədə daha incə və daha yüngül gövdə deməkdir. Ən vacib dəyişikliklərdən biri isə material tərəfindədir. HONOR 400 Pro-da plastik gövdə tənqid edilirdisə, bu dəfə həm HONOR 600, həm də HONOR 600 Pro alüminium çərçivə ilə təqdim olunur.

    Smartfonlar qızılı ağ, flaqman narıncı və qara rəng seçimlərində satışa çıxarılıb. Bu rənglər həm sadə HONOR 600, həm də HONOR 600 Pro üçün keçərlidir.

Gövdə qoruması gücləndirilib

    HONOR 600 seriyasında su və toza qarşı qoruma da təkmilləşdirilib. Smartfonlar IP68 və IP69 sertifikatları ilə yanaşı, IP69K qorumasına da sahibdir. IP69K göstəricisi cihazların yalnız suya və toza deyil, təzyiqli və isti suya qarşı da daha davamlı olduğunu bildirir.

    Əlbəttə, bu o demək deyil ki, smartfonları bilərəkdən isti suyun altında və ya sərt şəraitdə test etmək lazımdır. Lakin orta və orta-üst seqment üçün bu səviyyədə qoruma cihazların əsas üstünlüklərindən biridir. Bundan əlavə, smartfonlarda SGS sertifikatı da var. Bu isə cihazların müəyyən səviyyədə düşməyə, cızılmaya və gündəlik fiziki təsirlərə qarşı daha davamlı hazırlanmasına işarə edir.

Ekran daha kompakt və daha incə çərçivəlidir

    HONOR 600 və HONOR 600 Pro 6.57 düymlük AMOLED ekranla təchiz olunub. Maraqlıdır ki, əvvəlki HONOR 400 Pro-da ekran ölçüsü 6.7 düym idi. Buna görə yeni modeldə ekran kağız üzərində kiçilib. Lakin bunu daha çox kompaktlaşma kimi qiymətləndirmək olar. Çünki hər il ekran ölçüsünün böyüdülməsi istifadəçi təcrübəsi baxımından həmişə müsbət nəticə vermir.

    HONOR 600 Pro-da ekran çərçivələri daha da incəldilib və təxminən 0.98 mm səviyyəsinə endirilib. Bu, cihazın ön tərəfdən daha müasir görünməsinə səbəb olur. Ekran 120 Hz yenilənmə tezliyini dəstəkləyir. Panelin pik parlaqlığı isə 8000 nit olaraq göstərilir. Lakin bu göstəricinin real gündəlik parlaqlıq səviyyəsi deyil, daha çox müəyyən HDR səhnələrində və ekranın məhdud hissəsində əldə edilən maksimum dəyər olduğunu qeyd etmək lazımdır.

    Gündəlik istifadədə ekran parlaqlığı daha aşağı səviyyədə olsa da, günəş altında və HDR məzmunlarda panel kifayət qədər güclü təcrübə təqdim etməlidir. Ekranda HDR Vivid, DCI-P3 geniş rəng diapazonu, Netflix və Amazon Prime üçün HDR uyğunluğu, AI HDR Display 2.0 və AI Vivid Display 2.0 kimi imkanlar da var. Bu funksiyalar aşağı keyfiyyətli video məzmunların süni intellekt dəstəyi ilə daha keyfiyyətli görünməsinə kömək edir.

    Bununla belə, HONOR 600 Pro-da LTPO panel yoxdur. Yəni ekran yenilənmə tezliyini 1 Hz səviyyəsinə qədər endirə bilmir. Yenilənmə tezliyi əsasən 60 Hz, 90 Hz və 120 Hz aralığında tənzimlənir. LTPO panel istəyən istifadəçilər üçün HONOR-un daha yuxarı Magic seriyası daha uyğun seçim olaraq qalır.

Batareya əsas yeniliklərdən biridir

    HONOR 600 seriyasının ən ciddi yeniliklərindən biri batareyadır. Hər iki modeldə batareya tutumu 6000 mAh-dan 7000 mAh-a qaldırılıb. Buna baxmayaraq, gövdənin daha da incəlməsi diqqət çəkir. Bu nəticə silikon-karbon batareya texnologiyası hesabına əldə olunub.

    Azərbaycanda satılan HONOR 600 və HONOR 600 Pro modelləri 7000 mAh batareya ilə təqdim olunur. HONOR bu batareyanın 5 il ərzində sağlamlığını qorumağa hesablandığını bildirir. Bu, uzunmüddətli istifadə baxımından vacib göstəricidir.

    HONOR 600 Pro 80W naqilli, 50W naqilsiz və 27W naqilli əks enerji ötürmə imkanına sahibdir. Əks enerji ötürmə funksiyası telefonu müəyyən hallarda powerbank kimi istifadə etməyə imkan verir. Məsələn, naqilsiz qulaqlığı və ya enerjisi tam bitmiş başqa cihazı bu yolla enerji ilə təmin etmək mümkündür.

    HONOR 600 modelində isə 7000 mAh batareya və 80W naqilli enerji yığma dəstəyi qorunsa da, naqilsiz enerji yığma imkanı yoxdur. Bu, Pro modelin əsas fərqlərindən biridir.

    Maraqlı məqamlardan biri də odur ki, HONOR 600 Pro-da naqilli enerji yığma gücü əvvəlki modeldəki 100W-dan 80W-a endirilib. Bunun səbəbi böyük ehtimalla daha yüksək batareya sıxlığı və uzunmüddətli batareya sağlamlığının qorunması ilə bağlıdır. Çünki 7000 mAh batareyanı 7.8 mm-lik incə gövdəyə yerləşdirmək texniki baxımdan asan məsələ deyil.

Prosessor və yaddaş

    HONOR 600 Pro-nun əsas üstünlüklərindən biri flaqman səviyyəli prosessora sahib olmasıdır. Cihaz Snapdragon 8 Elite çipi ilə təchiz olunub. Bu çip ötən ilin flaqman Android smartfonlarında istifadə olunan ən güclü platformalardan biri hesab olunur. HONOR 600 Pro-nun orta-üst seqmentdə yerləşməsinə baxmayaraq belə bir çiplə gəlməsi onu daha yuxarı liqada rəqabət aparan modellərdən birinə çevirir.

    HONOR 600 isə Snapdragon 7 Gen 4 prosessoru ilə təqdim olunur. Bu çip orta seqment üçün kifayət qədər güclü və enerji səmərəli platformadır. Beləliklə, seriyada Pro model performans baxımından flaqmana yaxın təcrübə təqdim edir, sadə model isə daha balanslı orta seqment yanaşması ilə seçilir.

    Yaddaş tərəfində HONOR 600 Pro 12 GB RAM ilə gəlir. HONOR 600-də isə 8 GB RAM quraşdırılıb. Hər iki model 256 GB və 512 GB daxili yaddaş seçimləri ilə satışdadır. RAM-lar LPDDR5X standartındadır. Bu isə daha yüksək sürət və daha səmərəli enerji istifadəsi deməkdir.

    Smartfonlarda microSD kart dəstəyi yoxdur. Bununla belə, hər iki model 2 fiziki SIM və eSIM dəstəyinə sahibdir. Bu, xüsusilə iki nömrə istifadə edən və ya səyahət zamanı eSIM-dən yararlanmaq istəyən istifadəçilər üçün vacib üstünlükdür.

Sistem və yenilənmə dəstəyi

    HONOR 600 və HONOR 600 Pro qutusundan Android 16 üzərində qurulan MagicOS-in son versiyası ilə çıxır. Şirkət hər iki model üçün 6 il sistem yenilənmə dəstəyi vəd edir. Bu göstərici orta və orta-üst seqment üçün kifayət qədər yüksəkdir.

    Son illərdə istifadəçilər smartfon seçərkən yalnız kamera, batareya və prosessora deyil, yenilənmə dəstəyinə də ciddi diqqət edirlər. Bu baxımdan HONOR-un 6 illik yenilənmə vədi şirkətin bu seqmentdə daha güclü mövqe tutmaq istədiyini göstərir. Digər tərəfdən, HONOR-un yenilənmələri daha sürətli təqdim etməsi istifadəçi təcrübəsini daha da yaxşılaşdıra bilər.

    Azərbaycan bazarı üçün nəzərdə tutulan qutuda adapter başlığı və şəffaf qoruyucu keysin olması da əlavə üstünlükdür. Çünki bəzi Avropa versiyalarında bu aksesuarlar qutudan çıxmaya bilər.

Süni intellekt imkanları ön plana çıxarılıb

    HONOR yeni 600 seriyasını AI Phone, yəni süni intellekt smartfonu kimi mövqeləndirir. Google Gemini və Circle to Search kimi funksiyalar artıq müasir Android smartfonlarda geniş yayılıb. Lakin HONOR 600 seriyasında daha maraqlı AI imkanları da var.

    Ən diqqətçəkən xüsusiyyətlərdən biri fotodan video hazırlama funksiyasının inkişaf etdirilməsidir. HONOR burada Google Veo ilə əməkdaşlıq edib. İstifadəçi seçdiyi bir neçə foto üçün prompt yazaraq onlardan video hazırlaya bilir. Bundan əlavə, videonun ilk və son səhnəsini də təyin etmək mümkündür.

    AI Photo Agent funksiyası isə fotolar üzərində prompt vasitəsilə redaktə aparmağa imkan verir. Məsələn, istifadəçi “adamları sil”, “göy üzünü daha dramatik et”, “üzü işıqlandır” və ya “blur əlavə et” kimi sadə təlimatlarla fotonu redaktə edə bilər. Bu, əvvəllər Photoshop kimi proqramlarda edilən bəzi əməliyyatların artıq smartfon daxilində daha sadə formada yerinə yetirilməsi deməkdir.

    Bundan əlavə, obyekt silmə, foto genişləndirmə və piksel keyfiyyətini artırma kimi ənənəvi AI foto redaktə imkanları da hər iki modeldə mövcuddur.

    AI Settings funksiyası isə telefonun bəzi sistem əməliyyatlarını sadə mətn və ya təlimatlarla yerinə yetirməyə imkan verir. Bluetooth-u açmaq, hotspot-u aktivləşdirmək, qaranlıq rejimi qoşmaq kimi əməliyyatları süni intellekt vasitəsilə idarə etmək mümkündür. Bu imkanları daha rahat çağırmaq üçün cihazların sağ tərəfində xüsusi AI düyməsi də yerləşdirilib. İstifadəçi bu düymənin funksiyasını sistem daxilindən dəyişə bilir.

Kamera: Pro modelin əsas üstünlüyü telefoto lensdir

    HONOR 600 və HONOR 600 Pro-nun kamera sistemində əsas fərq telefoto kameradır. Pro model 50 MP telefoto lensə sahibdir. Sadə HONOR 600-də isə telefoto kamera yoxdur.

    Hər iki modeldə 200 MP əsas kamera istifadə olunub. Bu kamera f/1.4 diafraqma, avtofokus və OIS dəstəyi ilə gəlir. Əsas kamera gündəlik, portret və gecə çəkimləri üçün yüksək keyfiyyətli nəticə verməyə hesablanıb. Ultra geniş bucaqlı kamera isə 12 MP-dir. Bu kamera həm də makro çəkimlər üçün istifadə oluna bilir.

    HONOR 600 Pro-da telefoto kamera artıq 3x deyil, 3.5x optik yaxınlaşdırma təklif edir. Bu, kamera sistemindəki əsas dəyişikliklərdən biridir. Telefoto kamerada da avtofokus dəstəyi mövcuddur. AI Super Zoom funksiyası isə 10x, 20x və daha yuxarı rəqəmsal yaxınlaşdırma zamanı detalları süni intellekt vasitəsilə emal edərək daha aydın görüntü əldə etməyə kömək edir.

    Video tərəfində HONOR 600 Pro əsas və telefoto kameralarla 4K 60 FPS çəkim edə bilir. Ultra geniş bucaqlı kamera isə 1080p 30 FPS və 4K 30 FPS ilə məhdudlaşır. HONOR 600 modelində isə arxa kameralar maksimum 4K 30 FPS video qeydi aparır.

    Ön tərəfdə hər iki modeldə 50 MP selfi kamerası yerləşir. Pro model bu kamera ilə 4K 60 FPS video çəkə bilir. Sadə modeldə isə maksimum 4K 30 FPS dəstəyi var. Ümumi selfi keyfiyyəti, rənglər və portret çəkimlər seqment üçün yaxşı görünür. Bununla belə, Pro modeldə ön tərəfdəki dərinlik sensorunun ləğv edilməsi əvvəlki model ilə müqayisədə dəyişikliklərdən biridir.

Yekun qiymətləndirmə

    HONOR 600 seriyası əvvəlki 400 seriyası ilə müqayisədə bir neçə vacib istiqamətdə yenilənib. Dizayn tamamilə dəyişib, gövdə daha premium materiallarla hazırlanıb, batareya 7000 mAh-a yüksəlib, qoruma sertifikatları gücləndirilib, süni intellekt imkanları genişləndirilib və Pro model daha güclü prosessorla təqdim olunub.

    HONOR 600 Pro daha bahalı və daha performanslı seçimdir. Onu fərqləndirən əsas detallar Snapdragon 8 Elite çipi, telefoto kamera, naqilsiz enerji yığma və 4K 60 FPS video imkanlarıdır. HONOR 600 isə telefoto kameranın, naqilsiz enerji yığmanın və daha güclü çipin olmaması ilə Pro modeldən ayrılır, lakin qiymətinə görə balanslı təklif olaraq qalır.

    Ümumilikdə HONOR 600 və 600 Pro Azərbaycan bazarında orta və orta-üst seqmentdə ciddi rəqabət yarada biləcək modellərdir. Xüsusilə böyük batareya, uzun yenilənmə dəstəyi və süni intellekt imkanları bu seriyanı rəqiblərindən fərqləndirən əsas amillərdir.