Honor Earbuds 4 naqilsiz qulaqlığı təqdim edilib - QİYMƏTİ

     Honor şirkəti yeni naqilsiz qulaqlığı olan Honor Earbuds 4-ü təqdim edib. Honor Earbuds 4 kanal içi dizayna malikdir və 11 mm və 6 mm ölçülü iki audio drayver ilə təchiz edilib. Hər iki drayverdə titandan hazırlanmış diafraqma istifadə olunur. Qulaqlıqlar 50 dB-ə (desibel) qədər aktiv səsboğma funksiyasını dəstəkləyirlər və zənglər zamanı səsin effektiv şəkildə təmizlənməsi üçün hər qulaqlıqda 3 mikrofon yerləşdirilib. Qulaqlıq 20 Hz-dən 20 000 Hz-ə qədər geniş tezlik diapazonunda səs ötürür. Earbuds 4 həm ətraf səslərin şəffaflığı, həm də səs şəffaflığı rejimlərinə malikdir.

     Birinci rejim istifadəçilərə qulaqlıqları çıxarmadan avtomobil səsləri və siqnallar kimi ətraf səsləri eşitməyə imkan verir. İkinci rejim isə ətrafdakı insan səslərini gücləndirərək səs-küylü şəraitdə elanları və ya söhbətləri daha aydın eşitməyə kömək edir. Hər qulaqlıqda 45 mAh tutumlu batareya, şarj keysində isə 500 mAh-lıq batareya yerləşir. Tək bir şarjla 9 saat musiqi dinləmək mümkündür, şarj keysi ilə birlikdə isə Earbuds 4 ümumilikdə 46 saata qədər işləmə müddəti təmin edir. Qulaqlıqlar Bluetooth 5.3 texnologiyası vasitəsilə qoşulur. Honor Earbuds 4 yaxın günlərdə Çində satışa çıxacaq və onun qiyməti 48$ təşkil edəcək.