Bir vaxtlar Huawei şirkətinin tərkibinə daxil olmuş və sonradan ABŞ sanksiyaları səbəbilə müstəqil şirkətə çevrilmiş Honor öz ilk qatlana bilən smartfonunu təqdim edib. Şirkətin ilk qatlana bilən smartfonu Honor Magic V adını əldə edib. Şirkət ilk qatlana bilən smartfonunda əsas diqqəti xarici ekranın keyfiyyətinə, cihazın performansına, dözümlülük ilə təhlükəsizliyinə və kameralarına ayırıb. Honor şirkətinin məlumatına əsasən Honor Magic V-də qatlana bilən smartfonlar arasında ən yaxşı xarici ekrandan istifadə edilir. Smartfon 120 Hz-lik təsvir yenilənməsinə sahib 2560x1080 piksel keyfiyyətli 6.45 düym xarici AMOLED ekran (HDR10+ dəstəkli) ilə təchiz olunub.

    Maksimal dərəcədə nazik çərçivələr sayəsində ekran ön panelin 90%-ni əhatə edir. Bununla yanaşı xarici ekran nanokristaldan hazırlanmış xüsusi qoruyucu şüşə ilə əhatə edilib. Digər smartfonların ekranlarından fərqli olaraq sözügedən qoruyucu şüşə sayəsində smartfonun xarici ekranı 5 dəfə daha yaxşı qorunma özəlliyinə sahibdir. Daxili ekrana gəldikdə isə smartfon 90 Hz-lik təsvir yenilənməsinə sahib 2272x1984 piksel keyfiyyətli 7.9 düym AMOLED ekran (HDR10+ dəstəkli) ilə təchiz olunub. Qeyd etmək lazımdır ki, həm xarici ekran həm də daxili ekran ön kameraya sahibdir. Barmaq izi skanı texnologiyası smartfonun yandırıb/söndürmə düyməsinə inteqrasiya edilib.

    Əsas texniki göstəricilərə gəldikdə isə Honor Magic V smartfonu Snapdragon 8 Gen 1 prosessoru, 12 GB RAM, 256/512 GB daxili yaddaş həcmi, 50 MP (f/1.9, 23 mm fokus məsafəsi, 10 qat rəqəmsal zoom) + 50 MP (f/2.2 diafraqma, 122 dərəcə bucaq təsviri) + 50 MP (f/2.0 diafraqma, 20 mm fokus məsafəsi) üçlü arxa kamera, 42 MP-lik (f/2.4 diafraqma) xarici ön kamera, 42 MP-lik (f/2.4 diafraqma) daxili ön kamera və 66 vatt gücündə sürətli şarj texnologiyalı 4750 mAh enerji tutumlu batareya ilə təchiz olunub. Smartfon Magic UI 6 interfeysli Android 12 vasitəsilə çalışır. Bununla yanaşı smartfon Google servislərini də dəstəkləyir. Honor Magic V 18 yanvar tarixində satışa çıxacaq. 256 GB yaddaşa sahib model 1569$-a, 512 GB yaddaşa sahib model isə 1725$-a satılacaq.