HTC yeni smartfonu HTC U23 Pro-nu təqdim edib - QİYMƏTİ

    HTC şirkəti HTC U smartfon seriyasının son 3 ildə ilk smartfonunu təqdim edib. Söhbət, HTC U23 Pro-dan gedir. Sözügedən yeni smartfon dözümlü gövdəsi, yaxşı performansa sahib Snapdragon prosessoru və aktual olan interfeyslərin dəstəklənməsi ilə seçilir. Beləliklə HTC U23 Pro smartfonu 120 Hz-lik təsvir yenilənməsinə sahib Full HD+ keyfiyyətli 6.7 düym yastı OLED ekranla təchiz olunub. Ekranın yuxarı mərkəz hissəsində ön kamera üçün nəzərdə tutulmuş kiçik dairəvi çıxıntı yerləşdirilib. Bununla yanaşı ekran Gorilla Glass Victus qoruyucu şüşəsi ilə əhatə olunub. Smartfonun gövdəsi isə IP67 standartı üzrə sudan qorunur.

    Barmaq izi skanı texnologiyası yandırıb/söndürmə düyməsinə inteqrasiya edilib. HTC U23 Pro özündə kontaktsız ödənişlər üçün nəzərdə tutulmuş NFC çipi birləşdirir. Əsas texniki göstəricilərə gəldikdə isə smartfon Snapdragon 7 Gen 1 prosessoru, 8/12 GB RAM, 256 GB daxili yaddaş həcmi (microSD dəstəkli), 108 MP + 8 MP + 5 MP + 2 MP dördlü arxa kamera, 32 MP-lik ön kamera və 30 vatt gücündə sürətli şarj texnologiyalı 4600 mAh enerji tutumlu batareya ilə təchiz olunub. Smartfon həmçinin 15 vatt gücündə sürətli naqilsiz şarj texnologiyasını da dəstəkləyir. HTC U23 Pro Android 13 vasitəsilə çalışır. Smartfonun satışlarına yaxın günlərdə start verilməlidir. 8 GB RAM-a sahib model 552$-a, 12 GB RAM-a sahib model isə 585$-a satılacaq.