Huawei artıq uzun müddətdir ki, smartfon bazarının liderləri siyahısında deyil. ABŞ hökuməti tərəfindən şirkətə qarşı təyin edilmiş sanksiyaları nəzərə alsaq, Huawei yaxın zamanda smartfon bazarının liderləri arasına geri qayıda bilməyəcək. Lakin bununla belə şirkət smartfon bazarının bir seqmentində necəsə digər bütün şirkətləri geridə qoya bilib. Söhbət Fold form-faktoruna sahib qatlana bilən smartfonlardan gedir. Omdia adlı analitik şirkətin məlumatlarına əsasən Huawei bu ilin ikinci rübündə Samsung-u geridə qoyaraq Fold form-faktorlu qatlana bilən smartfonlar bazarının liderinə çevrilib. Məlumatda qeyd edilib ki, Huawei bu bazarın 32.9%-nə sahib olub. Şirkət bu cür nailiyyəti Mate X3 adlı qatlana bilən smartfon vasitəsilə əldə edə bilib. Qeyd etmək lazımdır ki, sözügedən smartfon demək olar yalnız Çin bazarında satılır.