Görünür, Huawei Mate 60 smartfonlarında Kirin 9000s prosessorunun istifadəsi qarşıdan gələn böyük dəyişikliklərin xəbərçisidir. Belə ki, Ice Universe ləqəbli məşhur insayderin vermiş olduğu məlumata əsasən Huawei şirkəti qlobal smartfon bazarına geri qayıtmağa hazırlaşır. Qeyd etmək lazımdır ki, hal hazırda şirkətin qlobal bazarda satılan smartfonları mövcuddur. Onlar hətta Avropada da satılır. Lakin smartfonlar heç də bütün ölkələrdə satılmır və üstəlik satışda olan modellər 5G dəstəyinə sahib deyillər. Bundan əlavə olaraq şirkətin heç də bütün smartfonları Çin bazarından kənarda satılmır.

    “Məlumata əsasən Huawei qlobal smartfon bazarına geri dönüş planını işə salıb. Ola bilsin ki, yaxın zamanda siz öz ölkənizdə yeni Huawei smartfonunu əldə edə biləcəksiniz. Mən bilirəm ki, çoxunuz bu anı gözləyirsiniz. Hal hazırki qlobal smartfon bazarı Samsung və Apple tərəfindən idarə olunur və o, innovasiyalara ehtiyac duyur. Huawei şirkətinin bu bazara geri dönüşü sözügedən qanunauyğunluğu aradan qaldırmağa hədəflənib” - deyə insayder qeyd edib. Zamanında Huawei artıq sübut edib ki, o, smartfon bazarında minimum ikinci, potensial olaraq isə birinci yeri tuta bilər. Lakin illər əvvəl ABŞ hökumətinin bu şirkətə qarşı tətbiq etmiş olduğu sanksiyalar şirkətin smartfon bazarındakı mövqelərini bir xeyli zəiflətdi. Şirkətin öz əvvəlki uğurunu təkrarlaya bilib-bilməyəcəyini yalnız zaman göstərəcək.