Huawei yaxın zamanda Kirin prosessorlu yeni cihazlarını təqdim edəcək

    Kirin prosessorunun Huawei smartfonlarına geri qayıtması çinli alıcılar arasında əsl heyranlıqla qarşılanıb. Belə ki, şirkət özünün yeni Mate 60 smartfonlarını sürətlə satmaqda davam edir. Lakin Huawei bununla yetinmək niyyətində deyil. Digital Chat Station ləqəbli məşhur insayderin vermiş olduğu məlumata əsasən şirkət yaxın zamanda Kirin prosessorlu digər yeni cihazlarını da təqdim edəcək. İnsayderin sözlərinə əsasən söhbət, MatePad planşetlərindən, nova 12 smartfon seriyasından və qatlana bilən qapaqlı yeni Pocket smartfonundan gedir.

    Məlumatda qeyd edilib ki, yeni Pocket üçün nəzərdə tutulmuş komponentlərin böyük hissəsi artıq istehsal olunub. Buna görə də insayder güman edir ki, sözügedən yeni smartfon ilin sonuna kimi təqdim oluna bilər. Digər bir insayderin sözlərinə əsasən isə şirkət üstəlik Mate 60 seriyasının daha bir modelini təqdim etməyə hazırlaşır və o, lüks smartfonlar siyahısına daxil olacaq. Gözləntilərə əsasən Mate 60 seriyasının növbəti modeli daha xüsusi dizayna sahib olacaq və daha premium materiallardan hazırlanacaq.