Humanoid robot Dünya Çempionatında şou göstərdi

    Hyundai və Boston Dynamics tərəfindən hazırlanan humanoid robot Atlas bu dəfə texnologiya sərgilərində deyil, dünyanın ən böyük futbol səhnəsində, 2026 FIFA Dünya Çempionatında diqqət mərkəzinə düşüb. Norveç və Braziliya arasında keçirilən 1/8 final qarşılaşmasının ikinci hissəsi başlamazdan əvvəl Atlas oyunçuların çıxdığı tuneldən meydana daxil olub. Robot meydanda müxtəlif futbolçu sevinclərini təqlid edib, o cümlədən Norveç millisinin ulduzu Erling Haalandın məşhur qol sevincini nümayiş etdirib. Lakin Atlasın stadiondakı rolu yalnız əyləncə ilə məhdudlaşmayıb. Humanoid robot ikinci hissənin başlanması üçün matç topunu hakimə təqdim edərək oyunun yenidən başlamasında simvolik rol oynayıb.

    ABŞ-nin Nyu-York–Nyu-Cersi stadionunda baş tutan qarşılaşmada Atlas öz vəzifəsini heç bir problem yaşamadan yerinə yetirib. Stadiondakı azarkeşlər isə robota böyük maraq göstərərək telefonları ilə onun görüntülərini lentə alıblar. Hyundai bildirib ki, Atlasın bu çıxışı şirkətin "Next Starts Now" kampaniyasının bir hissəsidir və məqsəd robot texnologiyalarının artıq gələcəyin deyil, bugünün reallığı olduğunu nümayiş etdirməkdir.