Intel daha sərfəli noutbuklar üçün Core Series 3 çiplərini elan edib

    Technote.az “The Verge” platformasına istinadən bildirir ki, Intel büdcə seqmentinə yönəlmiş yeni Panther Lake prosessorlarını təqdim edib. Şirkət daha sərfəli noutbuklar üçün nəzərdə tutulmuş Core Series 3 adlı yeni prosessor ailəsini elan edib. Bu çiplər texniki olaraq flaqman modellərlə eyni Intel 18A istehsal prosesi əsasında hazırlansa da, performans baxımından daha sadələşdirilmiş xüsusiyyətlərlə gəlirlər.

    Yeni xətt ümumilikdə 6 fərqli modeldən ibarətdir. Seriyanın ən güclü modeli 6 nüvəli Intel Core 7 360, ən giriş səviyyəli variantı isə 5 nüvəli Intel Core 3 304 prosessorudur. Intel-in daha premium seqmentə aid Core Ultra Series 3 modelləri ilə müqayisədə, bu yeni prosessorlarda CPU nüvələrinin sayı, Xe qrafik blokları, PCIe xətləri və süni intellekt performansı daha aşağıdır. Bundan əlavə, yeni Core Series 3 modelləri daha az enerji sərf edir, lakin maksimum 2 Thunderbolt 4 portu dəstəkləyir. Halbuki Ultra seriyasında bu göstərici 4-ə qədər yüksəlir.

    Intel bildirir ki, bütün bu ixtisarlar nəticəsində yeni Panther Lake prosessorları ilə təchiz olunan noutbuklar daha münasib qiymətə satışa çıxarılacaq. Lakin bu qiymət fərqinin nə qədər olacağı hələ məlum deyil. Acer, Asus, HP, Lenovo və digər istehsalçılar yaxın aylarda bu çiplərlə təchiz olunmuş modellərini təqdim edəcəklər. Burada istifadəçiləri çaşdıra biləcək əsas məqamlardan biri isə adlandırma sistemidir. Məsələn, daha güclü seriyada Core Ultra 5 322 modeli olduğu halda, yeni büdcə seriyasında Core 5 330 adlı model mövcuddur. Rəqəm olaraq 330 daha böyük görünsə də, əslində bu prosessor Ultra 322-dən zəifdir.

    Yeni Core Series 3 prosessorlarının əsas məqsədi Panther Lake arxitekturasını daha geniş istifadəçi kütləsinə çatdırmaqdır. Beləliklə, yüksək qiymətli premium noutbuklarda olan bəzi imkanların daha münasib modellərə gətirilməsi planlaşdırılır.