Intel Panther Lake-lə təchiz olunan Dell XPS 14 təqdim olundu

    Technote.az “Gizmodo” platformasına istinadən bildirir ki, Dell bir neçə uğursuz addımdan sonra yenidən klassik XPS brendinə qayıdıb və 2026-cı il üçün təqdim etdiyi yeni model olan Dell XPS 14 şirkətin nəhayət Apple-ın peşəkar seqmentinə ciddi şəkildə yaxınlaşdığını göstərir. Amma bu “MacBook olmaq” cəhdi hələ tam başa çatmayıb. Yeni XPS 14 dizayn və performans baxımından əvvəlkilərdən daha yetkin görünür. Cihaz Intel-in Panther Lake arxitekturasına əsaslanan Core Ultra X7 358H prosessoru ilə təchiz olunub və gücləndirilmiş inteqrə olunmuş qrafik nüvələrə malikdir. CPU testlərində MacBook Pro ilə rəqabət aparmaq çətin olsa da, iGPU performansı baxımından üstünlük göstərir. Bu da onu yüngül qrafik işləri, kontent istehsalı və hətta müəyyən kompromislərlə oyun üçün uyğun edir.

    Lakin qiymət məsələsi bir qədər “ağrılıdır”. X7 358H çipli versiya 2.200 dollara təklif olunur. 32 GB RAM, 1 TB yaddaş və OLED ekranlı konfiqurasiya isə daha cəlbedici olsa da, qiymət baxımından diskret qrafik kartlı 14 düymlük modellərlə, məsələn, Razer Blade 14 və ya Apple-ın M5-lə təchiz olunmuş modelləri ilə eyni səviyyədədir. Dell bu dəfə bəzi dizayn səhvlərini aradan qaldırıb. 2024 modellərində olan işıqlı və toxunma əsaslı funksiya paneli ləğv edilib, yerinə klassik fiziki düymələr qaytarılıb. Bu, xüsusilə görmə zəifliyi olan istifadəçilər üçün ciddi irəliləyişdir.

    Bununla belə, klaviatura yenə də mübahisəlidir. Düymələr bir-birinə çox yaxın yerləşdirilib və demək olar ki, bir səviyyədədir. Hər düymənin ortasında kiçik çökəklik var, amma bu, səhv basmaları tam aradan qaldırmır. Yazı zamanı təsadüfi səhvlər və eyni anda bir neçə düyməyə toxunma halları baş verir. Trackpad isə həm böyük, həm də haptik mexanizmə malikdir. Şüşə səthi və klik simulyasiyası premium hiss yaradır. Amma ölçüsünün böyük olması bilək hissəsi ilə toqquşmaya və “palm rejection” problemlərinə səbəb olur. Nəticədə təsadüfi kliklər və tez-tez CTRL+Z kombinasiyasına müraciət qaçılmaz olur. Korpus cəmi 0.58 düym qalınlığındadır. OLED versiyası 3 funt (təxminən 1.36 kq) çəkidədir. Müqayisə üçün, MacBook Air 2.7 funt və 0.44 düym qalınlıqdadır. XPS-in bir qədər qalın olmasının səbəbi aktiv soyutma sistemidir – MacBook Air passiv soyutma ilə işləyir.

    Port məsələsi isə artıq Apple üslubundadır. Cihazda cəmi üç ədəd Thunderbolt 4 USB-C portu mövcuddur. Nə HDMI, nə USB-A, nə də SD kart oxuyucu var. Əlavə olaraq, RAM lehimlidir və sonradan artırmaq mümkün deyil. Bu da istifadəçini əvvəlcədən daha yüksək konfiqurasiyaya pul xərcləməyə məcbur edir. Nəticə olaraq, Dell XPS 14 (2026) performans, dizayn və batareya ömrü baxımından Apple-a əvvəlkindən daha çox yaxınlaşır.