iOS 26 kodları AirTag 2-ni üzə çıxardı

    Macworld-un yeni məlumatına görə, Apple AirTag 2 bir sıra yenilənmiş funksiyalarla gələcək. Sayt iOS 26-nın daxili versiyasına çıxış əldə etdiyini və burada hələ təqdim olunmamış cihazlara dair istinadlar olduğunu bildirir.

    Sızan məlumatlara əsasən AirTag 2-də belə yeniliklər gözlənilir:
    •    Təkmilləşdirilmiş qoşulma prosesi. Cari AirTag qoşulma prosesi kifayət qədər sadə olsa da, adlandırma və emoji seçimi daha da yaxşılaşdırıla bilər.
    •    Ətraflı batareya göstəricisi. Yeni model batareya səviyyəsini daha dəqiq göstərməyə imkan verəcək.
    •    “Improved Moving” adlı funksiya. Macworld-un ehtimalına görə, bu xüsusiyyət hərəkətdə olan AirTag-i daha dəqiq tapmağa imkan verəcək. Hazırkı Precision Finding hərəkət zamanı dəqiqliyini itirir.
    •    İzdihamlı yerlərdə daha yaxşı izləmə. Bu funksiya insanların çox olduğu məkanlarda daha stabil və dəqiq izləmə təmin edəcək.

    Uzun müddətdir AirTag-in yeni versiyası ilə bağlı şayiələr gəzir və bildirilir ki, cihaz yeni Ultra Wideband (UWB) çipi ilə təchiz olunacaq. Bu çip Precision Finding-in məsafəsini artıracaq və əlavə izləmə imkanları verə bilər. AirTag 2-nin dizaynının dəyişəcəyi barədə heç bir məlumat yoxdur.

     iOS 26 kodunda cihaz “2025AirTag” adı ilə qeyd olunub. Bu, Apple-ın əvvəlcə onu 2025-ci ildə buraxmağı planlaşdırdığını göstərə bilər. Mövcud vəziyyətdə isə lansmanın 2026-cı ilin əvvəlinə qalması ehtimal edilir. Macworld həmçinin növbəti nəsil HomePod mini (S10 çipi ilə), daha ağıllı Siri versiyası və Apple-ın üzərində işlədiyi ev hub cihazına dair izləri də aşkar edib. Mövcud şayiələr bu məhsulların mart–aprel aylarında təqdim oluna biləcəyini göstərir.