iPhone 12-nin Fransada satışlarına ciddi problem səbəbilə qadağa qoyulub

    Fransa Milli Tezliklər Agentliyi (ANFR) ölkə ərazisində iPhone 12-nin satışlarının müəyyən müddətlik qadağan edildiyini elan edib. Səbəb isə sözügedən smartfonun elektromaqnit şüalanması göstəricisinin normadan artıq olması ilə bağlıdır. Fransanın rəqəmsal keçid və telekommunikasiyalar üzrə nazir nümayəndəsi Jean-Noel Barrot, Le Parisien qəzetinə müsahibəsində bildirib ki, bu barədə bildiriş artıq Apple şirkətinə göndərilib.

    "Milli Tezliklər Agentliyi Apple-dan iPhone 12-nin 12 sentyabr tarixindən Fransa bazarından çıxarılmasını istəyib. Belə ki, sözügedən smartfon modelində SAR göstəricisinin (insan toxumalarında 1 saniyə ərzində udulan elektromaqnit sahəsi enerjisini təyin edən göstərici) normadan artıq olduğu təyin edilib. ANFR şirkətdən yaranmış bu problemi tez bir zamanda bütün mümkün yollarla aradan qaldırılmasını istəyib. Əks halda şirkət satılmış bütün iPhone 12-ləri geri çağırmaq məcburiyyətində qalacaq" - deyə agentlik qeyd edib.

    Məlumatda qeyd edilib ki, iPhone 12-də SAR göstəricisi 1 kq üçün 5.7 vatt təşkil edir. Norma isə 1 kq üçün 4 vatt təşkil edir. Jean-Noel Barrot bildirib ki, Apple şirkətinin bu problemi aradan qaldırması üçün 2 həftə zamanı var. Onun sözlərinə əsasən problemi aradan qaldırmaq elə də çətin deyil. Şirkət sadəcə olaraq sözügedən smartfon üçün proqram təminatı yenilənməsini istifadəyə verməlidir.