Bloomberg saytınıın jurnalisti Mark Gurman öz mənbələrinə istinadən xəbər verib ki, Apple şirkəti öz növbəti təqdimatı tədbirini 7 sentyabr tarixində keçirdəcək. Bundan əlavə olaraq jurnalist bildirib ki, şirkət tədbiri bir qədər gec tarixə kimi də təxirə sala bilər. Lakin Apple təqdimatının adətən sentyabr ayının birinci yarısında baş tutduğunu nəzərə alsaq, təxirə salınma ehtimalı çox aşağıdır. Dünyada hələ də koronavirus pandemiyası olduğu üçün Apple şirkəti yeni məhsullarını online formatda təqdim edəcək. Gözləntilərə əsasən şirkət təqdimat tədbiri çərçivəsində iPhone 14, iPhone 14 Max, iPhone 14 Pro və iPhone 14 Pro Max smartfonlarını təqdim edəcək

    Son məlumatlara əsasən iPhone 14 Pro modelləri adi iPhone 14 smartfonları ilə müqayisədə daha çox dəyişikliyə məruz qalacaqlar. Belə ki, daha öncə verilmiş məlumatlarda qeyd edilmişdi ki, iPhone 14 Pro modellərinin ekranları üzərində ənənəvi çıxıntı hissə olmayacaq. Onun əvəzinə smartfonlar ekran üzərində iki ədəd kiçik ölçülü çıxıntı əldə edəcəklər. Onlardan biri dairəvi, digəri isə oval formada olacaq. Bundan əlavə olaraq iPhone 14 Pro modellərinin ekranlarının Always on Display funksiyasını əldə edəcəkləri gözlənilir.

    Daha bir məlumata əsasən iPhone 14 Pro modelləri yeni A16 Bionic prosessorunu əldə edəcəkləri bir vaxtda adi iPhone 14 modelləri keçən ilki A15 Bionic prosessoru ilə təchiz oluna bilərlər. Son illərdə Apple şirkəti öz smartfonlarını təqdimatdan sonra qısa müddət ərzində satışa çıxardır. Mark Gurman-ın sözlərinə əsasən şirkət iPhone 14 smartfonlarını 16 sentyabr tarixində satışa çıxartmağı planlaşdırır. Şirkətin gələn ay baş tutacaq təqdimat tədbirində həmçinin yeni Apple Watch smart saatlarının təqdim ediləcəyi gözlənilir. Heç istisna deyil ki, şirkət həm də naqilsiz AirPods Pro 2 qulaqlıqlarını təqdim etsin.