iPhone 15-lər Thunderbolt dəstəyini əldə edəcəklər

    iPhone 15 smartfonları üçün nəzərdə tutulmuş USB Type-C girişlərinin eksklüziv fotolarını əldə etmiş insayderlər bildiriblər ki, iPhone 15-lər Thunderbolt texnologiyasının dəstəyinə sahib olacaqlar. Qeyd etmək lazımdır ki, Thunderbolt Intel-in Apple ilə birgə hazırlamış olduğu hardware interfeys texnologiyasıdır. Bu texnologiya məlumatların yüksək sürətlə ötürülməsi üçün nəzərdə tutulub. Thunderbolt-un hal hazırki versiyası USB Type-C üzərindən Apple şirkətinin Mac və iPad kimi cihazlarında çalışır. İnsayderlər bildiriblər ki, iPhone 15 smartfonları üçün nəzərdə tutulmuş USB Type-C girişləri Retimer adlı çipə sahibdirlər.

    Bu çip isə adətən Thunderbolt dəstəkli cihazlarda siqnalın bərpasında və onun zəifləməsinin qarşısının alınmasında istifadə edilir. iPhone 15 modellərində reallaşdırılacaq USB Type-C girişləri məlumatları yüksək sürətlə ötürmə potensialına sahib ola bilərlər. Məsələn USB 2.0 əsasında çalışan Lightning girişi üzərindən məlumatlar saniyədə 480 Mbit sürətlə ötürülür. Ənənəvi USB Type-C girişləri məlumatları saniyədə 5-10 Gbit sürətlə ötürürlər. Lakin Thunderbolt-da bu göstərici saniyədə 40 Gbit-ə kimi yüksələ bilir. Thunderbolt dəstəyinin bütün iPhone 15 modellərində və ya yalnız iPhone 15 Pro modellərində olacağı bilinmir.