iPhone 15-lərdə olacaq USB-C girişlərini əks etdirən foto təqdim edilib

    Macrumors saytı iPhone 15 smartfonları üçün nəzərdə tutulmuş USB-C girişlərini əks etdirən fotonu təqdim edib. Təqdim edilmiş bu foto bir daha onu sübut edir ki, Apple şirkəti bu il öz smartfonlarında Lightning girişindən USB-C girişinə keçid edəcək. Qeyd etmək lazımdır ki, son aylar ərzində məşhur insayder Mark Gurman ilə analitik Ming-Chi Kuo məhz bunu bildirirlər.

    Şirkətin  USB-C girişinə keçid etməsi öz növbəsində Avropa Birliyinin bütün elektron cihazlar üçün vahid şarj girişi qanununa qiayət etməyə imkan verəcək. Gözləntilərə əsasən iPhone 15 Pro modellərindəki USB-C girişi məlumatların daha yüksək sürətlə ötürülməsini dəstəkləyəcək. Bu halda iPhone 15 və iPhone 15 Plus modellərində olacaq USB-C girişi məlumatların ötürülməsi məsələsində USB 2.0-ın sürətini dəstəkləyəcək. Qeyd etmək lazımdır ki, iPhone 15 smartfon seriyasının təqdimatı gələn ayın ortasına gözlənilir.