iPhone 15 Pro modellərində reallaşdırılacaq daha bir dəyişiklik məlum olub

    Bir neçə müddət bundan öncə iPhone 15 modellərinin CAD render fotolarını təqdim etmiş 9to5mac saytı bu dəfə iPhone 15 Pro modelləri barəsində yeni məlumatı təqdim edib. Beləliklə 9to5mac saytı Apple məhsulları üçün nəzərdə tutulmuş sertifikatlaşdırılmış aksesuarların istehsalı ilə yaxından tanış olan mənbəyə istinadən xəbər verib ki, bu ilki iPhone 15 Pro modellərində smartfonun səssiz rejimə keçirilməsi üçün olan düymə ənənəvi tərzdə reallaşdırılmayacaq. Qeyd etmək lazımdır ki, indiyənə kimi bu düymənin olduğu bütün iPhone-larda o, sürüşdürmə mexanizminə sahib olan düymə kimi reallaşdırılıb.

    Smartfonu səssiz və ya səsli rejimə keçirtmək üçün düyməni sadəcə olaraq sol və ya sağ istiqamətə sürüşdürmək lazımdır. Lakin verilmiş yeni məlumata əsasən iPhone 15 Pro modellərində səssiz rejimə keçirtmə düyməsi adi düymə tərzində reallaşdırılacaq və o, istifadəçinin barmaq toxunuşuna reaksiya verəcək. Bununla yanaşı məlumatda qeyd edilib ki, iPhone 15 Pro modellərində səsin tənzimlənməsi düymələri də fərqli şəkildə reallaşdırılacaq. Belə ki, indiyənə kimi iPhone modellərində səsin tənzimlənməsi imkanı iki düymədən ibarət idisə, iPhone 15 Pro modellərində bu, vahid bir düymə şəklində reallaşdırılacaq.