Unbox Therapy adlı məşhur Youtube kanalının paylaşmış olduğu 20 dəqiqəlik videoda Apple şirkətinin növbəti flaqman iPhone modelinin maketi sərgilənib. Videonun başlığında isə “Bu, iPhone 15 Ultra-dır” yazılıb. Lakin bu iPhone modelinin nəticə etibarilə necə adlanacağını heç kim bilmir. Mümkün variantlar arasında iPhone 15 Ultra, iPhone 15 Ultra Max və iPhone 15 Pro Max var. Unbox Therapy adlı Youtube kanalının müəllifi olan Lewis Hilsenteger videodakı maketin hardan əldə edildiyi barəsində məlumat verməyib. Lakin çox güman ki, maket smartfonlar üçün aksesuar istehsalı ilə məşğul olan şirkətlər vasitəsilə əldə edilib.

    O həmçinin bildirib ki, yaxın zamanda digər iPhone 15 modellərinin maketlərini də əldə edəcək. Hələ bir neçə müddət bundan öncə məlumat ortaya çıxmışdı ki, Apple bu il iPhone 15 və iPhone 15 Plus istisna olmaqla digər iPhone 15 modellərində fiziki düymələri sensorlu analoqlar ilə əvəz edəcək. Lakin daha sonra məlumat ortaya çıxdı ki, şirkət bu ideyadan imtina edib. Təqdim edilmiş bu videodan da görmək olar ki, iPhone 15 Ultra-da fiziki düymələr olduğu kimi qalacaq. Bununla belə smartfonun səssiz rejimə keçməsi üçün nəzərdə tutulmuş düymə klikləmə mexanizminə sahib olacaq. Həmçinin görmək olar ki, smartfonda Lightning girişi əvəzinə USB Type-C reallaşdırılıb.