iPhone 16 bu ilin birinci rübündə ən çox satılmış smartfon olub

     Counterpoint Research məlumatlarına əsasən, iPhone 16 2025-ci ilin birinci rübündə dünyanın ən çox satılan smartfonu olub. Bu nailiyyət Yaponiya və Afrika ölkələrində tələbatın artması, həmçinin Apple-ın uğurlu qiymət strategiyası sayəsində mümkün olub. 2 illik fasilədən sonra iPhone-un baza modeli yenidən birinci yerə qayıdıb. Apple qlobal olaraq ən çox satılan smartfonların ilk 10-luğunda 5 mövqe tutub. Bu, əvvəlki illərdə olduğu kimi, bütün istehsalçılar arasında ən yaxşı nəticədir. Xüsusilə iPhone 16 Yaponiya, Yaxın Şərq və Afrika ölkələrində yüksək satış göstəriciləri əldə edib.

     Yaponiyada isə iqtisadi vəziyyətin yaxşılaşması və subsidiyaların yenidən nəzərdən keçirilməsi Apple-ı yerli alıcılar üçün daha cəlbedici edib. iPhone 16 Pro Max və iPhone 16 Pro modelləri ikinci və üçüncü yerləri tutublar. Lakin Çində bu modellərin satışları 6000 yuan (833$) və daha ucuz cihazlara dövlət dəstəyinin göstərilməsi, həmçinin Huawei ilə rəqabət səbəbindən yavaşlayıb. Buna baxmayaraq, Pro versiyalar iPhone satışlarının demək olar ki, yarısını təşkil edib. Reytinqdə dördüncü yeri iPhone 15 tutub. SE modelini əvəz edən yeni iPhone 16e isə mart ayında altıncı yerə yüksəlib, baxmayaraq ki, əvvəlki modelə nisbətən daha baha qiymətə təklif olunur.

     Samsung Galaxy S25 Ultra satış dövrünün qısalığı səbəbilə yeddinci yerə düşüb. Bununla belə, Galaxy S25 seriyası ilin əsas aylarında şirkətin satışlarının dörddə birini təmin edib. Google Gemini ilə dərin inteqrasiya isə Samsung-a istifadəçi fərdiləşdirilməsini və rahatlığını gücləndirməyə imkan verib. Eyni zamanda, Samsung-un reytinqdəki iştirakı 1 il əvvəlki 5 modeldən 4 modelə qədər azalıb. Galaxy A16 5G 2025-ci ilin birinci rübündə beşinci yeri tutub və 2024-cü ilin birinci rübü ilə müqayisədə reytinqdə bir pillə yüksəlib. Model illik ifadədə 17% artım göstərib ki, bu da əsasən Şimali Amerika kimi bazarlarda daha geniş əlçatanlıqla əlaqədardır.

     Bu smartfon həmin regionda 2025-ci ilin yanvarında satışa çıxarılıb. Galaxy A06 da təsirli artım nümayiş etdirib və ucuz smartfonlara olan tələbat sayəsində ilk onluğa daxil olub. Apple və Samsung markalarından kənar reytinqə daxil olan yeganə model Xiaomi-nin Redmi 14C 4G smartfonu olub. Onun satışları ötən illə müqayisədə 43% artıb və o, xüsusilə inkişaf etməkdə olan bazarlarda büdcəli seqmentdə güclü oyunçu olaraq qalır. Geosiyasi qeyri-müəyyənlik və ticarət maneələri şəraitində ekspertlər hesab edirlər ki, ilk 10 model bazar payını qoruyub saxlayacaq. Counterpoint Research yazır ki, bu, iri brendlərin unikal imkanlara malik flaqman cihazlara verdiyi üstünlüklə təmin olunur. Bu cihazlar hələ də alıcı marağını cəlb etməyə davam edirlər.