iPhone 17e barədə yeni detallar ortaya çıxıb

    Technote.az “Apple Insider” platformasına istinadən bildirir ki, iPhone 17e modeli ilə bağlı yeni sızıntılar gözləntiləri bir qədər aşağı salır. Məşhur sızıntı mənbəyi Jon Prosser bu model haqqında əvvəlki məlumatlarını təkrarlasa da, prosessor məsələsində müəyyən qeyri-müəyyənlik olduğunu bildirib.

    Prosser-in sözlərinə görə, iPhone 17e modelində A19 çipinin istifadə olunacağı gözlənilir, lakin bunun tam güclü versiya yox, “binned” variant ola biləcəyi ehtimalı var. Bu cür çiplər adətən daha sərfəli modellərdə istifadə olunur. Əgər bu iddia doğru çıxarsa, iPhone 17e gündəlik istifadə üçün kifayət qədər güclü olsa da, yüksək performans tələb edən oyun və ya ağır tətbiqlərdə digər A19-lu modellərdən geri qala bilər.

    Prosser hazırda Apple tərəfindən sızıntılar səbəbilə məhkəmə iddiası ilə üzləşsə də, gələcək modellərlə bağlı açıqlamalar verməyə davam edir. O, yaxın zamanda iPhone 18 Pro modelində ön kameranın sol tərəfə köçürüləcəyini iddia etmişdi, lakin sonradan bunun yanlış tərcümə nəticəsində ortaya çıxdığı bildirildi. iPhone 17e ilə bağlı digər bir sual isə dizaynla əlaqədardır. Prosser “Dynamic Island” funksiyasının bu modeldə olub-olmayacağına tam əmin olmadığını qeyd edib. Onun fikrincə, Apple yenidən köhnə “notch” dizaynına qayıdarsa, bu, istifadəçilər arasında narazılıq yarada bilər.

    Hazırkı gözləntilərə əsasən iPhone 17e modelinin 2026-cı ilin fevral ayının ortalarında təqdim ediləcəyi gözlənilir. Lakin həm prosessor, həm də dizaynla bağlı qeyri-müəyyənliklər modelin bazardakı mövqeyinə təsir göstərə bilər.