iPhone 18 Pro çərçivəsiz ekranı və daha kiçik Dynamic Island-ı əldə edə bilər

     Apple uzun zamandır iPhone ekranlarında çərçivələrdən və çıxıntılardan qurtulmağa çalışır, eyni zamanda ön kameradan və Face ID funksiyasından imtina etmədən. Son illərdə bu istək şirkətin smartfon dizaynında bir sıra dəyişikliklərə səbəb olub, lakin gələcəkdə istifadəçiləri daha ciddi yeniliklər gözləyə bilər. Məlumata görə, gələn il təqdim olunması gözlənilən iPhone 18 Pro modelində çıxıntısız və çərçivəsiz ekran olacaq, daha sonra isə ön kamera ekranın altına yerləşdiriləcək. Birinci nəsil iPhone modelindən iPhone 7-yə qədər olan dövrdə tərtibatçılar ekranın yuxarı və aşağı hissəsində geniş çərçivələrdən istifadə edirdilər. Bu sahələrdə Home düyməsi, səsgücləndirici və ön kamera kimi müxtəlif komponentlər yerləşdirilirdi.

     Lakin 2015-2016-cı illərə gəldikdə bu dizayn artıq köhnəlmiş sayılırdı, xüsusilə də o dövrdə Android smartfonları daha incə çərçivələrə malik cihazlar təklif etdiyi və barmaq izi skaneri artıq arxa və ya yan panele keçirildiyi bir vaxtda. Apple bu problemi 2017-ci ildə iPhone X modelini təqdim etməklə həll etdi. Bu modeldə Touch ID funksiyasını Face ID əvəz etdi, fiziki düymə ləğv olundu və ekranın yuxarı hissəsində bütün zəruri sensorları yerləşdirməyə imkan verən çıxıntı (notch) yaradıldı. O vaxtdan bəri Apple bu çıxıntını tədricən təkmilləşdirib və zamanla bu sahə hazırda iPhone 16 modellərində mövcud olan Dynamic Island-a çevrilib. Gözlənilir ki, bu ilin ikinci yarısında təqdim olunacaq iPhone 17 modelində dizayn dəyişməz qalacaq.

     Lakin 2026-2027-ci illərdə Apple daha ciddi addımlar atmağı planlaşdırır. Məlumata görə, 2026-cı ildə mühəndislər Face ID komponentlərini ekranın altına keçirməyi nəzərdə tuturlar. Bu, hazırda Dynamic Island-ın bir hissəsi olan uzunsov çıxıntıdan imtina etməyə imkan verəcək. Beləliklə, yalnız ön kamera üçün minimal ölçülü bir çıxıntı qalacaq. Şayiələrə görə, ön kamera ekranın mərkəzində deyil, sol yuxarı küncündə yerləşdirilə bilər. Gözlənilir ki, bu cür dizayn iPhone 18 Pro və iPhone 18 Pro Max modellərində tətbiq olunacaq. Bu da 2027-ci ildə Apple-ın ekranaltı ön kameraya sahib ən azı bir iPhone modeli təqdim edəcəyinin xəbərçisi olacaq. Tam çərçivəsiz və çıxıntısız ekranla təchiz olunmuş bu yeni smartfon dizaynı, orijinal iPhone-un 20 illik yubileyinə həsr olunacaq.

Mənbə: Macrumors