iPhone 18 Pro-nun dizaynı dəyişməyəcək? İlk aksesuarlar ortaya çıxdı

    Apple iPhone 18 Pro seriyasını hələ rəsmi olaraq təqdim etməsə də, bəzi mağazalarda yeni modellər üçün nəzərdə tutulduğu deyilən aksesuarlar artıq satışa çıxarılır. Lakin belə aksesuarları indidən almaq riskli ola bilər. Bloomberg jurnalisti Mark Qurmanın diqqət çəkdiyi məlumata görə, OtterBox şirkətinin iPhone 18 Pro üçün olduğu göstərilən qoruyucu qabları Best Buy mağazalarında görünməyə başlayıb. Maraqlısı odur ki, söhbət tamamilə yeni qabdan yox, hazırda iPhone 17 Pro üçün satılan OtterBox Figura modelindən gedir. Məhsulun üzərinə iPhone 18 Pro ilə uyğunluq da əlavə edilib.

    Bu, iPhone 18 Pro-nun əvvəlki nəsillə eyni ölçülərə və korpus quruluşuna sahib ola biləcəyi ehtimalını gücləndirir. Ancaq Apple yeni smartfonları təqdim etmədiyi üçün bunun doğru olub-olmadığını təsdiqləmək mümkün deyil. Əvvəlki illərdə bəzi yeni iPhone modelləri köhnə nəsil üçün hazırlanmış qablarla uyğun olub. Lakin düymələrin, kameraların və ya korpus ölçülərinin cüzi dəyişməsi belə əvvəlki aksesuarların istifadəsini mümkünsüz edə bilər. Məsələn, iPhone 17 Pro-da kamera hissəsinin və MagSafe sisteminin yerləşməsindəki dəyişikliklər səbəbindən iPhone 16 Pro üçün hazırlanmış qablar yeni modelə uyğun gəlmirdi.

    Hazırkı məlumatlara əsasən, iPhone 18 Pro-nun dizaynında iPhone 17 Pro ilə müqayisədə böyük dəyişiklik gözlənilmir. Bununla belə, iPhone 18 Pro Max modelinin ölçülərində dəyişiklik ola biləcəyi bildirilir.