iPhone 18 Pro qara rəngsiz təqdim oluna bilər

    Technote.az “Apple Insider” platformasına istinadən bildirir ki, Apple-ın bu ilin payızında təqdim etməsi gözlənilən iPhone 18 Pro modeli ilə bağlı maraqlı bir iddia ortaya çıxıb. Məlumata görə, şirkət yeni modeldə qara rəng variantını təqdim etməyə bilər. Bu, artıq ikinci il olacaq ki, Apple Pro seriyasında klassik qara rəngdən imtina edir.

    Sızıntıları ilə tanınan Weibo istifadəçisi Instant Digital bildirib ki, iPhone 18 Pro modelində qara rəng variantı siyahıdan çıxarılıb. Qeyd edək ki, Apple artıq iPhone 17 Pro modelində də qara rəng əvəzinə Cosmic Orange adlı yeni rəng təqdim etmişdi və cihaz Silver və Deep Blue rəngləri ilə satışa çıxarılmışdı. Hazırda iPhone 18 Pro modellərinin hansı rənglərdə təqdim olunacağı tam dəqiqləşməyib. Lakin bəzi məlumatlara görə, Apple bu il yeni tünd qırmızı və bənövşəyi rənglər üzərində işləyir. Əgər bu məlumatlar doğru çıxarsa, Apple Pro modellərində daha parlaq və fərqli rəng strategiyasına keçid etmiş olacaq.

    Digər maraqlı məqam isə Apple-ın ilk qatlana bilən telefonu iPhone Fold modelidir. Gözləntilərə görə, Apple iPhone 18 seriyası ilə birlikdə iPhone Fold modelini də sentyabr ayında təqdim edəcək. iPhone 18 Pro modellərinin satışa dərhal çıxarılması planlaşdırılsa da, qatlana bilən iPhone modelinin satışları noyabr və ya dekabr ayına qədər gecikə bilər. Analitiklər hesab edir ki, Apple-ın qara rəngdən imtina etməsi şirkətin dizayn və marketinq strategiyasının dəyişməsi ilə bağlıdır. Şirkət son illərdə daha fərqli və diqqət çəkən rənglərə üstünlük verməyə başlayıb.