iPhone istifadəçilərinə yeni Genmoji təklifləri gəlir

    Technote.az “Apple Insider” platformasına istinadən bildirir ki, Apple iOS 27 və iPadOS 27 ilə birlikdə süni intellekt əsaslı Genmoji funksiyasını daha çox istifadəçiyə çatdırmaq üçün yeni dəyişikliklər hazırlayır. Şirkət bu dəfə istifadəçiləri Genmoji yaratmağa təşviq etmək üçün həm yazılan mətnlərdən, həm də “Photos” tətbiqində saxlanılan şəkillərdən istifadə edəcək.

    Hazırda iPhone istifadəçiləri mesaj yazarkən klaviaturada standart emoji təklifləri ilə qarşılaşırlar. Bloomberg-in Power On bülletenində yer alan məlumata görə, iOS 27 ilə bu sistem genişlənəcək və istifadəçilərə avtomatik Genmoji təklifləri də göstəriləcək. Yəni istifadəçi tez-tez yazdığı ifadələr və “Photos” tətbiqindəki şəkillər əsasında sistem tərəfindən hazır Genmoji variantları təklif ediləcək.

    Məsələn, istifadəçi müəyyən ifadələr yazdıqda və ya fotolarında müəyyən şəxslər və obyektlər olduqda, sistem bunları analiz edərək uyğun Genmoji yaratmağı təklif edə biləcək. Bununla Apple Genmoji funksiyasının istifadəsini artırmağı hədəfləyir. Bununla yanaşı, Apple bu funksiyanı məcburi etməyəcək. İstifadəçilər ayarlar bölməsində xüsusi seçim vasitəsilə “Suggested Genmoji” funksiyasını söndürə biləcəklər.

    Qeyd edək ki, Apple artıq iOS 26 versiyasında da Genmoji üzərində bir sıra yeniliklər etmişdi. İstifadəçilər “Smiling”, “Shocked”, “Sleepy” kimi əmrlərlə fərqli üz ifadələri yarada, həmçinin saç, eynək və papaq kimi xüsusiyyətlər əlavə edə bilirdilər. Şirkət eyni zamanda Genmoji üçün süni intellekt modelini yeniləmiş, nəticələrin keyfiyyətini artırmış və Tapback reaksiyalarına dəstək əlavə etmişdi. Apple-ın Genmoji ilə bağlı yeniliklərini şirkətin iyun ayında keçiriləcək WWDC 2026 tədbirində təqdim edəcəyi gözlənilir.