iPohne 15 Pro smartfonları üçün Thunderbolt naqilinin fotoları təqdim edilib

    iPhone 15 smartfonlarında olacaq USB Type-C girişi ilə bağlı məlumatlar son zamanlarda daha çox ortaya çıxır. Az əvvəl verdiyimiz xəbərdə qeyd edilib ki, iPhone 15 və iPhone 15 Plus modellərindəki USB Type-C-nin sürəti məhdudlaşdırılmış olacaq və o, USB 2.0-ın sahib olduğu çalışma sürətini özündə birləşdirəcək. İndi isə iPhone 15 Pro modellərində olacaq USB Type-C-nin yüksək çalışma sürətinə sahib olacağına dair sübut ortaya çıxıb.

    Belə ki, insayderlərdən biri iPhone 15 Pro modelləri üçün nəzərdə tutulmuş Thunderbolt naqilinin fotolarını təqdim edib. Fotolardan da görmək olar ki, 70 sm-lik uzunluğa sahib naqil Apple şirkətinin son MacBook noutbuklarının şarj naqilləri kimi hörülmüş səthə sahibdir. Bununla belə fotolarda əks olunmuş naqil olduqca qalındır. Məlumatda qeyd edilib ki, sözügedən naqil USB 4 Gen 2 standartına uyğun olacaq. Bunun sayəsində o, məlumatların saniyədə 20 Gbit sürətlə ötürülməsini dəstəkləyəcək. Thunderbolt naqilinin iPhone 15 Pro modellərinin komplektlərinə daxil olacağı və ya ayrıca satılacağı bilinmir.