Keçmiş Tesla mühəndisi Avropanın humanoid robotunu hazırlayır

    Tesla-nın Optimus humanoid robotunun süni intellekt sisteminin hazırlanmasında iştirak etmiş keçmiş mühəndis Remi Cadene yeni startapı UMA (Universal Mechanical Assistant) ilə Avropanın öz humanoid robotunu yaratmağa hazırlaşır. Şirkət artıq "Northstar" adlı yeni robot layihəsini təqdim edib. Parisdə fəaliyyət göstərən UMA-nın hazırladığı Northstar ilk mərhələdə istehsal müəssisələri və logistika anbarları üçün nəzərdə tutulub. Gələcəkdə isə robotun evlərdə, xəstəxanalarda və laboratoriyalarda da istifadə olunması planlaşdırılır. Cadene bildirib ki, şirkət artıq təxminən 50 potensial müştəri ilə əməkdaşlıq imkanlarını müzakirə edir və əsas diqqəti ilk növbədə Avropa bazarına yönəldib.

    Remi Cadene 2021-2024-cü illərdə Tesla-da çalışaraq həm Autopilot sistemi, həm də Optimus robotunun ilk neyron şəbəkələrinin hazırlanmasında iştirak edib. Daha sonra o, açıq mənbəli robot təlim platforması olan LeRobot layihəsinə rəhbərlik etmək üçün Hugging Face şirkətinə qoşulub. UMA-nın qurucu heyəti də diqqət çəkir. Komandada keçmiş Google DeepMind və NYU alimi Pierre Sermanet, LeRobot-un həmtəsisçisi Simon Alibert və məşhur açıq mənbəli SO-100 robot qolunun yaradıcısı Robert Knight yer alır.

    Şirkətin investorları arasında isə Greycroft, Red River West, Kima Ventures və Factorial fondları var. Bundan əlavə, Meta-nın baş süni intellekt alimi və Turing mükafatı laureatı olan Yann LeCun və Hugging Face-in həmtəsisçisi Thomas Wolf şirkətin məsləhətçiləri sırasındadır. UMA 2026-cı ildə logistika, istehsalat və səhiyyə sahələrində bir neçə pilot proqram həyata keçirməyi planlaşdırır. Şirkətin məqsədi real iş mühitində hərəkət edə, əşyaları tanıya və manipulyasiya edə bilən humanoid robotlar hazırlamaqdır.

    Avropada işçi qüvvəsi çatışmazlığının artması və sənaye müəssisələrinin avtomatlaşdırmaya olan ehtiyacı humanoid robot bazarını sürətlə böyüdür. Lakin UMA bu sahədə tək deyil. Almaniyanın Neura Robotics və Sereact kimi şirkətləri, həmçinin ABŞ-ın Figure AI və 1X Technologies kimi startapları da humanoid robot yarışında ön sıralarda yer alırlar.