Keychron yeni Q1 Ultra 8K klaviaturasını təqdim etdi

    Technote.az “Apple Insider” platformasına istinadən bildirir ki, mexaniki klaviatura bazarında tanınan brendlərdən biri olan Keychron yeni flaqman modeli Q1 Ultra 8K ilə istifadəçilərin qarşısına çıxıb. Şirkət bu modeli əvvəlki Q1 Max versiyasının davamı kimi təqdim edir və əsas yeniliklər performans və texniki imkanlar üzərində cəmlənib.

    Yeni modelin əsas fərqləndirici xüsusiyyəti 8K “polling rate” dəstəyidir. Bu isə klaviaturanın hər düymə basımını standart modellərdən 8 dəfə daha sürətli oxuması deməkdir. Lakin qeyd olunur ki, bu funksiya standart olaraq aktiv deyil və uyğun cihazlarda manual aktivləşdirilməlidir. Q1 Ultra 8K həm simsiz, həm də naqilli istifadə imkanları təqdim edir. İstifadəçilər Bluetooth 5.3, 2.4 GHz dongle və ya kabel vasitəsilə qoşulma seçimlərindən istifadə edə bilirlər. Klaviatura eyni anda 5 cihaz arasında keçid etməyə imkan verir.

    Texniki baxımdan model ZMK firmware ilə işləyir və bu, enerji səmərəliliyini artırır. Nəticədə arxa işıqlandırma söndürülmüş vəziyyətdə batareya ömrü 660 saata qədər çata bilir. RGB işıqlandırma isə 22-dən çox effekt və tam fərdiləşdirmə imkanı təqdim edir. Dizayn baxımından böyük dəyişikliklər yoxdur. Klaviatura yenə də metal korpus, çoxqatlı səs izolyasiya sistemi və fərdiləşdirilə bilən komponentlərlə gəlir. İstifadəçilər düymələri, switch-ləri və daxili quruluşu tam dəyişə bilirlər.

    Yeni modelin qiyməti təxminən 229.99 dollar təşkil edir. Ekspertlər bildirir ki, bu model əvvəlki versiyadan ciddi dizayn fərqləri ilə seçilməsə də, performans və batareya baxımından əhəmiyyətli inkişaf təqdim edir.