Kodak 35 mm plyonkalı yeni EC35 kamerasını təqdim etdi

    Plyonkalı fotoqrafiyaya marağın artdığı bir dövrdə Reto Project yeni Kodak EC35 modelini təqdim edib. Cəmi 34,99 dollar qiymət etiketi ilə satışa çıxarılan kamera bazarda ən sərfəli 35 mm plyonkalı modellərdən biri hesab olunur. Kodak brendi altında təqdim edilən EC35, ötən il satışa çıxarılan və 99 dollar qiymətə malik Kodak Snapic A1 modelindən də daha əlçatandır. Kamera sadə istifadəyə fokuslandığı üçün əlavə funksiyalar minimuma endirilib.

    Model 25 mm fokus məsafəsinə malik akril obyektiv, sabit f/10 diafraqma və 1/100 saniyəlik sabit örtük (shutter) sürəti ilə təchiz olunub. Bu xüsusiyyətlər onu klassik birdəfəlik plyonkalı kameralara yaxınlaşdırır. İstifadəçi plyonkanı əl ilə irəli və geri sarımalı olur. Kamera həmçinin zəif işıq şəraitində avtomatik aktivləşən daxili flaşa malikdir. Snapic A1 modelindən fərqli olaraq, EC35-də ikiqat ekspozisiya (double exposure) və ya zona fokuslama kimi funksiyalar yoxdur. Şirkət bildirir ki, əsas məqsəd kameranı mümkün qədər sadə və istifadəsi rahat etməkdir.

    EC35-in diqqətçəkən xüsusiyyətlərindən biri obyektivi qoruyan sürüşdürülən linza qapağıdır. Bu dizayn vaxtilə məşhur olan Olympus Stylus (Mju) seriyasını xatırladır. Yeni model müxtəlif rəng seçimləri ilə təqdim olunur. İstifadəçilər kameranı sarı, lavanda, açıq mavi, çəhrayı, yaşıl, ağ və qara rənglərdə əldə edə biləcəklər. Linza qapağının gövdədən bir qədər tünd rəngdə hazırlanması isə kameraya daha fərqli görünüş qazandırır. Reto Project-in məqsədi plyonkalı fotoqrafiyanı daha geniş auditoriya üçün əlçatan etməkdir. Aşağı qiyməti və sadə istifadəsi sayəsində Kodak EC35 xüsusilə analoq fotoqrafiyaya yeni başlayan istifadəçiləri hədəfləyir.