Süni intellektli tualet qurğuları nəcis və sidiyi avtomatik təhlil edir

    Süni intellektlə işləyən ağıllı tualet qurğuları artıq istifadəçinin nəcis və sidik göstəricilərini avtomatik izləyir. 2029 ilinin sonunadək qlobal bağırsaq sağlamlığı bazarının 106 milyard dollara (təxminən 180,2 milyard manat) çatacağı gözlənilir. Bu sahədə çalışan “Kohler Health” və “Throne” tualetə bərkidilən kameralı cihazlar təklif edir. Alqoritm nəcis və sidiyin rəngini, qatılığını və digər göstəriciləri təhlil edir. Nəticə bir neçə dəqiqə sonra tətbiqdə göstərilir.

    “Kohler Health” cihazı 449 dollar (təxminən 760 manat), ailə üçün illik üzvlük isə 130 dollar (təxminən 220 manat) qiymətinə təklif olunur. “Throne” qurğusunun qiyməti 399 dollar (təxminən 680 manat), illik üzvlüyü isə 70 dollardır (təxminən 120 manat). Startap iyulda 10 milyon dollar (təxminən 17 milyon manat) maliyyə cəlb edib. Hər 2 cihaz işıq sensoru istifadəçinin oturduğunu müəyyən etdikdə çəkilişə başlayır. Şirkətlər kameranın yalnız kasanın daxilinə baxdığını və yuxarı çevrilə bilmədiyini deyirlər.

    Şirkətlər bu məhsulların evdə aparılan mikrobiom testlərindən fərqli işlədiyini bildirirlər. Qurğular sağlam və ya xəstə hökmü vermək əvəzinə, hər şəxsin adi həzm qaydasını müəyyənləşdirməyə çalışır. Gastroenteroloqların fikrincə, bağırsaq fəaliyyəti normal olan sağlam insanlar cihazdan çox az yeni məlumat ala bilərlər. Uzunmüddətli izləmə qida, dərman və susuzluqla bağlı təkrarlanan dəyişiklikləri üzə çıxara bilər. İltihabi bağırsaq xəstəliyi olanlar üçün avtomatik qeydlər həkimin istədiyi gündəliyi əvəz edə bilər.

    “Throne” növbəti nəsil cihazda müxtəlif işıq dalğaları ilə çəkiliş apararaq nəcisdə gözlə seçilməyən qan izlərini aşkarlamağı planlaşdırır. Yenilənmiş qurğu 2 il ərzində satışa çıxarıla bilər, qiyməti müəyyənləşməyib. Yoğun və düz bağırsaq xərçəngi son 10 ildə gənclər arasında artıb və 50 yaşdan aşağı şəxslərdə xərçəngdən ölümün əsas səbəbinə çevrilib. Lakin yeni üsulun laboratoriya testləri qədər etibarlı olub olmadığı hələ məlum deyil. “Kohler Health” isə hazırkı qurğunun tualetdə qan aşkarladıqda istifadəçini xəbərdar etdiyini bildirir.

    Gastroenteroloqlar cihazların xərçəngin erkən yoxlanması üçün hələ çox bahalı olduğunu deyirlər. Belə yoxlama bədənə müdaxilə tələb etməməli və ucuz olmalıdır, bu məhsullar isə cihazla yanaşı daimi abunə haqqı istəyir. İstifadəçinin öz sağlamlıq məlumatlarına çıxış üçün hər il ödəniş etməsi xidmətdən ayrılmağı çətinləşdirə bilər. Hər 2 şirkət görüntülərlə yanaşı ad, demoqrafik məlumat, pəhriz və dərman məlumatlarını toplayır. “Kohler Health” dəqiq məkanı da izləyir, “Throne” isə bunu etmir.

    Hər 2 şirkət sağlamlıq məlumatlarını hədəflənmiş reklam üçün paylaşmadığını bildirir. Bununla belə, qaydalar məlumatın polis, şirkətin yeni sahibi, texniki xidmət və müştəri xidməti göstərən tərəfdaşlarla bölüşülməsinə imkan verir. “Kohler Health” məlumatları satmaq niyyətində olmadığını, “Throne” isə açıq icazə olmadan bunu etməyəcəyini və tədqiqat paylaşımının könüllü olacağını bildirir. Alıcılar cihazın gündəlik tibbi faydasını verdikləri məlumat və uzunmüddətli abunə xərci ilə müqayisə etməlidirlər.