LG CES 2026-da “canvas” üslublu yeni Gallery TV-ni təqdim edəcək

    Technote.az “Engadget” platformasına istinadən bildirir ki, LG CES 2026 sərgisində incəsənət yönümlü yeni televizorunu LG Gallery TV modelini təqdim etməyə hazırlaşır. Yeni TV 55 və 65 düym ölçülərində satışa çıxarılacaq və divara tam yapışan dizaynı, eləcə də dəyişdirilə bilən maqnit çərçivələri ilə seçiləcək.

    LG Gallery TV Mini LED panel, Alpha 7 AI prosessoru və 4K təsvir ölçüsü ilə təchiz olunub. Model, eyni zamanda, ödənişli LG Gallery+ xidməti ilə işləyir. Bu platforma istifadəçilərə 4 500-dən çox sənət əsərindən ibarət rəqəmsal kolleksiyanı televizorda nümayiş etdirməyə imkan verir. Bundan əlavə, generativ süni intellekt vasitəsilə fərdi vizuallar yaratmaq və şəxsi foto arxivindən şəkillər göstərmək də mümkün olacaq.

    Şirkətin açıqlamasına görə, TV muzey kuratorları ilə birgə hazırlanıb. Xüsusi Gallery Mode rejimi rəsm və sənət əsərlərinin teksturasını daha real göstərmək üçün parlaqlıq və rəng balansını avtomatik tənzimləyir. Ekran əksolunma və parıltını azaltma texnologiyalarına malikdir və gün ərzində dəyişən ətraf işıq səviyyəsinə uyğun olaraq təsvir parametrlərini avtomatik yeniləyir.

Bu, LG-nin incəsənət yönümlü ilk televizoru deyil. Şirkət 2020-ci ildə ultra nazik LG GX Gallery TV modelini təqdim etmişdi. Lakin yeni LG Gallery TV, birbaşa olaraq Samsung The Frame və Hisense CanvasTV kimi modellərə rəqib kimi mövqeləndirilir. CES 2026 6–9 yanvar tarixlərində Las-Veqasda keçiriləcək və sərgi zamanı LG-nin yeni məhsulu ilə bağlı daha detallı texniki məlumatların açıqlanacağı gözlənilir.