LG monitorları Windows 11-də reklam göstərməyəcək

  Microsoft LG monitorlarını Windows 11 kompüterlərinə qoşan istifadəçilərin qarşılaşdığı McAfee reklam bildirişlərinin dayandırılması üçün LG-yə təzyiq göstərib. Şirkət bildirib ki, LG artıq monitorlarla birlikdə quraşdırılan tətbiq vasitəsilə göstərilən McAfee pop-up bildirişlərini deaktiv etməyə razılaşıb.

  Məsələ ondan ibarətdir ki, LG monitoru Windows 11 kompüterinə qoşulduqda, Windows Update vasitəsilə istifadəçinin açıq razılığı olmadan LG Monitor App Installer adlı proqram avtomatik yüklənirdi. Bu tətbiq isə istifadəçilərə McAfee antivirusunun sınaq versiyasını və LG-nin digər proqramlarını quraşdırmağı təklif edən reklam pəncərələri göstərirdi. Bu davranışla bağlı ilk şikayətlər hələ 2024-cü ildən başlayıb. Mövzu ilə bağlı açıqlama verən Microsoft-un Windows bölməsinin rəhbəri Pavan Davuluri bildirib ki, LG McAfee reklam bildirişlərini dərhal deaktiv etməyə razılaşıb. O əlavə edib ki, Microsoft gələcəkdə də tərəfdaş şirkətlərlə birlikdə bu cür istifadəçi təcrübəsini pozan halların qarşısını almaq üçün işləməyə davam edəcək.