LG Nvidia ilə birlikdə humanoid robot hazırlayır

    LG humanoid robot bazarına daxil olmağa hazırlaşır. Şirkət 2027-ci ilin ilk rübündə Nvidia texnologiyaları ilə təchiz edilmiş ikiayaqlı humanoid robotunu nümayiş etdirməyi planlaşdırır. LG və Nvidia bununla bağlı avqustun 13-də Nvidia-nın ABŞ-nin Santa Klara şəhərində yerləşən baş qərargahında əməkdaşlıq müqaviləsi imzalayıblar. Tədbirdə LG Corp-un sədri Kwang Mo Koo və Nvidia-nın baş direktoru Jensen Huang da iştirak edib. Hazırlanacaq robotun əsas süni intellekt və hesablama texnologiyalarını Nvidia təmin edəcək. Robot məlumatların birbaşa öz üzərində emalı və hərəkətlərin idarə olunması üçün Nvidia Jetson Thor platformasından istifadə edəcək. Eyni zamanda robotda fiziki dünyanı anlamaq və müxtəlif tapşırıqları yerinə yetirmək üçün hazırlanmış Isaac GR00T süni intellekt modeli tətbiq olunacaq.

    Robotun təhlükəsiz fəaliyyəti üçün isə Nvidia-nın Halos sistemi istifadə ediləcək. Şirkət Halos-u robotlar üçün hazırlanmış tam əhatəli təhlükəsizlik platforması kimi təqdim edir. Xüsusilə insanların yanında işləyəcək humanoid robotlarda təhlükəsizlik məsələsi sənayenin qarşısında duran əsas problemlərdən biri hesab olunur. Robotun fiziki komponentlərinin böyük hissəsini isə LG şirkətlər qrupu özü istehsal edəcək. Aktuator və sensorların LG Electronics və LG Innotek, batareyaların isə LG Energy Solution tərəfindən hazırlanması nəzərdə tutulur. Beləliklə, humanoid robotun əsas aparat komponentlərinin əhəmiyyətli hissəsi LG ekosistemindən gələcək.

    Humanoid robotdan əvvəl LG başqa robotunu real istehsalat şəraitində sınaqdan keçirəcək. Şirkət CLOiD adlı təkərli robotunu 2026-cı ilin sonuna qədər ABŞ-nin Tennessi ştatındakı paltaryuyan maşın zavodunda işə salmağı planlaşdırır. Burada əldə olunan real məlumatlar LG CNS-in PhysicalWorks platformasında yaradılan sintetik məlumatlarla birlikdə gələcək robotların öyrədilməsində istifadə ediləcək. LG və Nvidia əməkdaşlığı daha böyük hesablama infrastrukturu layihələrini də əhatə edir. Nvidia-nın Vera Rubin platforması əsasında AI Factory layihəsinin ilk mərhələsinin 2027-ci ilin birinci yarısında istifadəyə verilməsi, 2028-ci ilin ilk yarısında isə Cənubi Koreyanın Çonan şəhərində 80 meqavat gücündə hesablama mərkəzinin yaradılması planlaşdırılır.