Lumus CES 2026-da smart eynəklər üçün indiyədək ən geniş baxış bucağını təqdim etdi

     Lumus şirkəti CES 2026 sərgisində smart eynəklər üçün nəzərdə tutulan yeni nəsil dalğaötürücü (waveguide) texnologiyasını təqdim edərək sektorda böyük diqqət çəkdi. Şirkət daha əvvəl Meta Ray-Ban Display eynəklərində istifadə olunan texnologiyası ilə tanınsa da, yeni modellər əvvəlki həlləri artıq köhnəlmiş kimi göstərir.

     Meta Ray-Ban Display eynəkləri bazara çıxanda tam rəngli və təxminən 20 dərəcə baxış bucağına (FOV) malik olması ilə fərqlənirdi. Lakin Lumus-un CES 2026-da nümayiş etdirdiyi yeni waveguide-lar smart eynəklərin gələcək imkanlarını ciddi şəkildə genişləndirir. Sərgidə sınaqdan keçirilən ilk model Lumus-un optimallaşdırılmış Z-30 waveguide texnologiyasına əsaslanır. Bu model 30 dərəcə FOV təqdim etməklə yanaşı, əvvəlki nəsillərlə müqayisədə 30 % daha yüngül, 40 % daha nazik və daha enerji qənaətlidir. Şirkətin açıqlamasına görə, bu texnologiya hər vat üçün 8.000 nitdən çox parlaqlıq təmin edə bilir ki, bu da batareya tutumu məhdud olan smart eynəklər üçün böyük üstünlükdür. 720 x 720 təsvir ölçüsünə baxmayaraq, görüntülər olduqca parlaq, kəskin və rəng baxımından zəngin idi.

      Lakin ən təsirli yenilik Lumus-un 70 dərəcəlik FOV təqdim edən waveguide-ları oldu. Bu texnologiya linzanın demək olar ki, bütün mərkəzi hissəsini əhatə edərək indiyədək görülmüş ən geniş görüntü sahələrindən birini yaradır. Kənarlarda cüzi optik təhriflər müşahidə edilsə də, şirkət bunun kommersiya modellərində proqram təminatı ilə düzəldiləcəyini bildirir. Ümumilikdə isə bu dalğaötürücülər smart eynəklər üçün ən kəskin, ən parlaq və ən keyfiyyətli optik həllərdən biri kimi qiymətləndirilir.

Lumus-un geometrik reflektiv waveguide texnologiyası refraktiv alternativlərlə müqayisədə daha yüksək səmərəlilik təqdim edir və linzalarla birbaşa optik birləşməyə imkan yaradır. Bu isə keçid (Transitions) linzaların istifadəsini mümkün edir və əlavə gün eynəyi kliplərinə ehtiyacı aradan qaldırır. Şirkət həmçinin istehsal prosesinin daha sadə olduğunu, waveguide qalınlığının 0,8 mm-ə qədər azaldıla bildiyini və istehsal səmərəliliyinin yüksəldiyini vurğulayır.

Hazırda Lumus Quanta və SCHOTT kimi tərəfdaşlarla birlikdə yeni texnologiyanın kütləvi istehsalını sürətləndirir. Bu da smart eynəklər bazarında növbəti böyük dalğanın məhz bu texnologiya üzərində qurulacağını göstərir.