Marshall yeni Stockwell III dinamikini təqdim etdi

    Marshall məşhur Stockwell Bluetooth dinamikinin yeni versiyasını təqdim edib. Şirkət yeni Stockwell III modelində təkcə səs keyfiyyətini və batareya ömrünü artırmaqla kifayətlənməyib, həm də cihazın təmir oluna bilməsinə xüsusi diqqət yetirib. Yeni model əvvəlki nəsillərdə olduğu kimi klassik Marshall dizaynını qoruyub saxlayır. Dinamik iri daşıma qulpu, bütün istiqamətlərə yayılan səs texnologiyası və retro görünüşü ilə seçilir. Stockwell III avqustun 4-dən etibarən Marshall-ın rəsmi mağazasında və Costco vasitəsilə 249,99 dollar qiymətinə satışa çıxarılacaq.

    Yeniliyin əsas üstünlüklərindən biri batareya ömrünün əhəmiyyətli dərəcədə artırılmasıdır. Əvvəlki Stockwell modeli təxminən 20 saat işləyə bildiyi halda, Stockwell III bir enerji doldurulması ilə 40 saatdan çox istifadə imkanı təqdim edir. Marshall həmçinin istifadəçilərə batareyanı dəyişdirmək imkanı yaradıb. Şirkət bu yanaşmanı ötən ay təqdim etdiyi Mid A.N.C. simsiz qulaqlıqlarında da tətbiq etmişdi. Beləliklə, batareyanın köhnəlməsi səbəbindən cihazın tamamilə istifadədən çıxarılmasının qarşısı alınacaq və məhsulun istismar müddəti uzanacaq.

    Təmir edilə bilən hissələr yalnız batareya ilə məhdudlaşmır. İstifadəçilər dinamikin məxmər örtüklü daşıma qayışını, ön və arxa qoruyucu torlarını, həmçinin korpusu əhatə edən silikon örtüyünü də dəyişə biləcəklər. Bu isə cihazın uzun illər yeni görünüşünü qorumasına və ikinci əl bazarında dəyərinin yüksək qalmasına kömək edə bilər. Stockwell III əlavə olaraq USB-C üzərindən enerji bankı kimi fəaliyyət göstərə bilir və digər cihazları enerji ilə təmin edə bilir. Toz və suya davamlılıq səviyyəsi də yüksəldilib. Əvvəlki model IPX4 sertifikatına malik olduğu halda, yeni versiya IP55 standartını dəstəkləyir ki, bu da onu açıq hava istifadəsi üçün daha uyğun edir.

    Marshall dinamikin idarəetmə panelini də yeniləyib. Yeni əlavə olunan M düyməsi istifadəçilərə əvvəlcədən qurulmuş səs profilləri arasında keçid etməyə imkan verir. Ayrı media idarəetmə düyməsi vasitəsilə isə musiqini dayandırmaq, başladmaq və mahnılar arasında keçid etmək mümkündür.