Xiaomi-nin Redmi brendinin yaxın həftələr ərzində Redmi Note 13 smartfon seriyasını təqdim edəcəyi gözlənilir. Təqdimat müddəti yaxınlaşdıqca bu smartfon seriyası barəsində daha çox məlumat ortaya çıxır. Redmi Note 13 seriyası barəsində növbəti məlumatları Digital Chat Station ləqəbli məşhur insayder təqdim edib. Beləliklə insayderin sözlərinə əsasən Redmi brendi minimum 3 ədəd Redmi Note 13 modelini təqdim edəcək. Onların hamısı 120 Hz-lik təsvir yenilənməsinə sahib 1.5K keyfiyyətli 6.67 düym OLED ekranla təchiz olunacaqlar.

    Bundan əlavə olaraq smartfonlar özlərində 200 MP + 8 MP + 2 MP üçlü arxa kameranı birləşdirəcəklər. Smartfonlardakı ön kamera isə 16 MP təşkil edəcək. Məlumatda qeyd edilib ki, Redmi Note 13 modellərindən biri MediaTek Dimensity 7200 prosessoru vasitəsilə çalışacaq və 120 vatt gücündə sürətli şarj texnologiyalı 5000 mAh enerji tutumlu batareyaya sahib olacaq. Digər iki model 67 vatt gücündə sürətli şarj texnologiyalı 5120 mAh enerji tutumlu batareyanı əldə edəcək və həmin iki modeldən biri Snapdragon 7 Gen 1 prosessoru vasitəsilə çalışacaq. Redmi Note 13 smartfon seriyasının gələn ay təqdim olunacağı gözlənilir.