OnLeaks ləqəbli məşhur insayder Samsung Galaxy A54 5G smartfonunun keyfiyyətli render fotolarını təqdim edib. Təqdim edilmiş fotolardan belə qənaətə gəlmək olar ki, xarici görünüşcə Galaxy A54 5G modeli Galaxy S23-ə bənzəyəcək. Smartfon 6.4 düym ölçülü yastı ekran əldə edəcək və ekranın yuxarı mərkəz hissəsində ön kamera üçün nəzərdə tutulmuş kiçik dairəvi çıxıntı yerləşəcək. Məlumatda qeyd edilib ki, Galaxy A54 5G-nin ekranı həmçinin 120 Hz-lik təsvir yenilənməsini dəstəkləyəcək.

    Ekran növünə gəldikdə isə o, Ful HD+ keyfiyyətli AMOLED ekran olacaq. Smartfonun arxa panelində üç ədəd kamera obyektivi yerləşəcək. Fotolardan da görmək olar ki, kamera obyektivləri Galaxy S22-də olduğu kimi xüsusi sahənin daxilində yerləşməyəcəklər. Onlar birbaşa smartfon gövdəsinə inteqrasiya ediləcəklər. Galaxy A54 5G-nin digər texniki özəllikləri barəsində məlumat yoxdur. Lakin çox güman ki, sözügedən smartfon Samsung-un Exynos prosessoru vasitəsilə çalışacaq. Galaxy A54 5G-nin təqdimat tarixi barəsində heç bir məlumat verilməyib.