Honor şirkəti 29 may tarixində Honor 90 smartfon seriyasını təqdim edəcək. Yəni bu smartfon seriyasının təqdimatına sayılı günlər qalıb. Qeyd etmək lazımdır ki, seriyaya Honor 90 və Honor 90 Pro modelləri daxil olacaqlar. Digital Chat Station ləqəbli məşhur insayder isə təqdimata sayılı günlər qalmış bu smartfonların texniki özəllikləri barəsində məlumatları təqdim edib. Beləliklə insayderin sözlərinə əsasən adi Honor 90 modeli 120 Hz-lik təsvir yenilənməsinə sahib 1.5K+ keyfiyyətli 6.7 düym OLED ekran ilə təchiz olunacaq. Ekranın kənar hissələri əyilmiş dizaynda reallaşdırılacaq.

    Honor 90 modeli Snapdragon 7 Gen 1 prosessoru vasitəsilə çalışacaq və 200 MP-lik əsas arxa kameraya, 50 MP-lik ön kameraya və 66 vatt gücündə sürətli şarj texnologiyalı 5000 mAh enerji tutumlu batareyaya sahib olacaq. Honor 90 Pro-ya gəldikdə isə insayderin sözlərinə əsasən smartfon 120 Hz-lik təsvir yenilənməsinə sahib 6.78 düym OLED ekran ilə təchiz olunacaq. Onun Snapdragon 8+ Gen 1 prosessoru vasitəsilə çalışacağı və özündə ikili ön kamera ilə 90 vatt gücündə sürətli şarj texnologiyalı 5000 mAh enerji tutumlu batyareyanı birləşdirəcəyi gözlənilir.