Meta ağıllı eynəklərindəki "Conversation Focus" funksiyasına istifadə məhdudiyyəti tətbiq edib

    Meta şirkəti ağıllı eynəklərində təqdim etdiyi "Conversation Focus" funksiyasına yeni məhdudiyyətlər tətbiq edib. Məlumata görə, istifadəçilər bu funksiyadan artıq əvvəlki kimi limitsiz yararlana bilməyəcəklər.

    Şirkətin dəstək səhifəsində yer alan məlumata əsasən, "Conversation Focus" funksiyası ay ərzində cəmi 3 saat pulsuz istifadə edilə bilər. Daha uzun müddət istifadə etmək istəyənlər isə aylıq 20 dollar dəyərində Meta One Premium abunəsinə keçməli olacaqlar. Bununla belə, ödənişli istifadəçilər üçün də limit mövcuddur. Premium abunəçilər bu funksiyadan ayda maksimum 15 saat istifadə edə biləcəklər və istifadə edilməyən saatlar növbəti aya köçürülməyəcək.

    "Conversation Focus" funksiyası ilk dəfə 2025-ci ilin dekabrında təqdim olunub. Bu xüsusiyyət süni intellekt və səs emalı texnologiyalarından istifadə edərək istifadəçinin qarşısındakı insanın səsini daha aydın eşitməsinə kömək edir. Xüsusilə səs-küylü restoranlar, tədbirlər və izdihamlı məkanlarda danışıq səslərini ətraf səslərdən ayırmaq üçün nəzərdə tutulub. Maraqlısı odur ki, bu funksiya internet bağlantısı və ya Meta-nın serverlərinə ehtiyac duymadan birbaşa cihaz üzərində işləyir. Buna görə də Meta-nın məhz bu funksiyaya niyə vaxt limiti tətbiq etdiyi hələlik açıqlanmayıb.

    Şirkət bildirir ki, ağıllı eynəklərdən istifadə etmək üçün ödənişli abunə məcburi deyil, lakin bəzi inkişaf etmiş funksiyalar gələcəkdə yalnız müəyyən limitlər çərçivəsində təqdim oluna bilər.